जानकी नवमीमा राष्ट्रिय बिदा दिन शाह नेतृत्वको सरकारसँग साधुसन्तको आग्रह

प्रदेश

जनकपुरधाम । जनकपुरधामका साधुसन्तहरुले ‘जानकी नवमी’ को दिन राष्ट्रिय बिदा दिन बालेन्द्र शाह नेतृत्वको नवगठित सरकारसँग आग्रह गरेका छन् । शुक्रबार जनकपुरधामस्थित तुलसी सदनमा पत्रकार सम्मेलन गर्दै जनकपुरधामका साधुसन्तहरुले वैशाख १२ गत्ते राष्ट्रिय बिदा दिन सरकारसँगआग्रह गरेका हुन् । रामायणकालिन इतिहास बोकेको जनकपुरधामको भूमिमा जन्मेकी माता सीतालाई राष्ट्रिय विभूतिको संज्ञा दिँदै देशभरि सीता माताको जन्मजयन्ती मनाउनु पर्ने रामानन्दीय वैष्णव समाजका अध्यक्ष एवम् जानकी मन्दिरका छोटे महन्त राम रोशन दासले बताए ।

महन्त दासले बालेन साह नेतृत्वको सरकारले हालसम्म उत्कृष्ट काम गर्दै आएकोले जनकपुरधामका साधुसन्त पनि आशावादी रहेको जनाएका छन् । जानकी नवमीको दिन प्रदेश सरकारले बिदा दिँदै आए पनि क्यालेन्डरमा भने बिदा अङ्कित नहुनु दुःखद् भएको महन्त दासले गुनासो गरे । उनले विश्वमा रामसीताको पूजा हुने गरे पनि आफ्नै देशमा माता सीता उपेक्षित हुनु दुःखद पक्ष भएको पनि गुनासो गरेका छन् ।

प्रत्येकवर्ष झैँ यस वर्ष पनि जनकपुरधामको जानकी मन्दिरसहित अन्य सम्पूर्ण मठमन्दिरहरूमा जानकी नवमी धूमधामका साथ मनाइने भएको छ । उक्त दिन जानकी मन्दिरमा विशेष पूजा पाठ, दीप प्रज्वलनलगायत धार्मिक कार्यक्रमहरू हुने महन्त ठाकुरले यस सञ्चारमाध्यमलाई जानकारी दिएका छन् । ।

Comments

प्रकाशित मिति : 2026-04-04

जानकी नवमीमा राष्ट्रिय बिदा दिन शाह नेतृत्वको सरकारसँग साधुसन्तको आग्रह

Comments

अरु समाचार