कानून दिवसको अवसरमा न्यायकर्मीहरूबीच ब्याडमिन्टन प्रतियोगिता, मानबहादुर र शेरबहादुरको टोलीलाई उपाधि (तस्बिरहरु)

राजनीति

काठमाडौँ । कानून दिवसको अवसरमा न्यायकर्मीहरूबीच ब्याडमिन्टन प्रतियोगिता आयोजना गरिएको छ । जस नेपालद्वारा आयोजित प्रतियोगिताको उद्घाटन ललितपुर उच्च अदालत पाटनका मुख्य न्यायाधीश लालबहादुर कुँवरले गरेका थिए । शनिबारदेखि २ दिन चलेको प्रतियोगितामा १८ टोलीका ३६ जना प्रतिस्पर्धी सहभागी भएका थिए । महिलातर्फ ४ टोलीका ८ जना सहभागी थिए ।

प्रतियोगिताअन्तर्गत पुरुषतर्फ सर्वोच्च अदालतका रजिष्ट्रार मानबहादुर कार्की र जिल्ला अदालतका कर्मचारी शेरबहादुर थापाको टोली प्रथम भयो। त्यसैगरी जीवन कालाखेती र महेशसिंह धामीको टोली दोस्रो भयो । यसैगरी कृष्ण खड्का र विनियोजन कुमालको टोलीले तेस्रो स्थान हासिल गर्न सफल भएको कार्यक्रम संयोजक सदिक्षा अर्यालले जानकारी दिइन् ।

महिलातर्फ सिमस कुँवर र लसता मल्लको टोली प्रथम भयो भने पूजा खड्का र सुलोचना थापाको टोली दोस्रो भएको छ । प्रतियोगितामा रेफरीको भूमिकामा विधान रिजाल रहेका थिए । ललितपुर उच्च अदालतको ब्याडमिन्टन हलमा आयोजना गरिएको प्रतियोगितामा माननीय न्यायाधीशहरू, कानून तथा न्याय सेवाका कर्मचारी, सरकारी वकील तथा कानून व्यवसायीहरूको सहभागिता रहेको थियो । प्रतियोगिताको पुरस्कार वितरण भने छुट्टै कार्यक्रममार्फत गरिने आयोजकले जनाएको छ ।

Comments

प्रकाशित मिति : 2026-05-10

Comments

अरु समाचार