कर्णाली दुर्घटनापछि उद्धारमा ढिलाइबारे संसदमा सरकारलाई प्रश्न, रुलिङ गर्न माग

राजनीति

काठमाडौं । दैलेखस्थित कर्णाली नदीमा यात्रुवाहक सवारीसाधन दुर्घटनामा परेको घटनापछि उद्धार तथा सरकारी सक्रियतामाथि प्रतिनिधिसभामा प्रश्न उठेको छ।

सोमबार बसेको प्रतिनिधिसभाको बैठकको शून्य समयमा राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानबहादुर (ज्ञानेन्द्र) शाहीले असार १८ गते सुर्खेतबाट कालीकोटतर्फ जाँदै गरेको यात्रुवाहक फोर्स गाडी कर्णाली नदीमा खसेको घटनाबारे सरकारले हालसम्म स्पष्ट जानकारी सार्वजनिक नगरेको भन्दै असन्तुष्टि जनाए।

उनले विपद्का बेला राज्य प्रभावकारी रूपमा परिचालित हुन नसकेको टिप्पणी गर्दै घटनाको सत्यतथ्य सार्वजनिक गर्न, उद्धार कार्यमा भएको ढिलाइको छानबिन गर्न तथा जिम्मेवार निकायको जवाफदेहिता सुनिश्चित गर्न सभामुखमार्फत सरकारलाई रुलिङ गर्न माग गरे।

बैठकमा नेपाली कांग्रेसकी प्रमुख सचेतक बासना थापाले पनि दुर्घटनाबारे सरकारले शीघ्र आधिकारिक जानकारी उपलब्ध गराउनुपर्ने बताइन्। कर्णाली क्षेत्रमा राज्यको पर्याप्त ध्यान नपुगेको उल्लेख गर्दै उनले कर्णाली राजमार्गको स्तरोन्नतिलाई प्राथमिकतामा राख्न सरकारसँग आग्रह गरिन्।

असार १८ गते दैलेखको चामुण्डाबिन्द्रासैनी नगरपालिका–७ स्थित कर्णाली नदीमा क.प्र.०२–००१ ख १०५५ नम्बरको यात्रुवाहक फोर्स गाडी दुर्घटनामा परेको थियो। दुर्घटनामा एक जनाको मृत्यु भएको पुष्टि भएको छ भने चार जना अझै बेपत्ता रहेका छन्।