रोल्पाको सुकीदह गाउँपालिकामा श्रीमान चुनाव बहिस्कार गर्दै श्रीमती भने कांग्रेस उम्मेदवार

समाचार

रोल्पा, २२ जेठ । रोल्पाको सुकिदह गाउँपालिकामा पनि यतिवेला चुनावी माहोल चलिरहेको छ । असार १४ गतेलाई तोकिएको दोस्रो चरणको स्थानीय तह निर्वाचनका लागि सवैतिर चुनावी माहोल तातिरहेको छ । दुई दशकपछि भएको चुनावमा धेरै नयाँ नयाँ घटनाहरु सार्वजनिक भए । एउटै पदमा आमा छोरी, बाबु छोरा, दाई भाई तथा आफन्तहरुको उम्मेदवार परेको भन्ने समाचार सामान्य भईसकेका छन् ।

तर सुकिदह गाउँपालिकाको चुनावमा भने भिन्नै भईरहेको छ । सुकिदह गाउँपालिकामा श्रीमान चुनाव वहिस्कारमा रहेका छन्, भने श्रीमती काँग्रेसको तर्फवाट उम्मेदवार बनेकी छन् । श्रीमान श्रीमतीको यस्तो चर्चाको प्रत्यक्षमा मारमा उनीहरुका छोराछोरी परेका छन् ।

बिप्लब नेतृत्वको नेकपा माओवादीले चुनाव बहिस्कार गरेको छ । सो पार्टीको शिक्षक संगठनका जिल्ला नेता नेत्र वलीकी पत्नी अमृताकुमारी केसी भने कांग्रेसबाट सुकिदह गाउँपालिका उपाध्यक्षमा उम्मेदवार बनेकी छन् । अब मतदाता प्रश्न गर्न थालेका छन्, वलीले पार्टी निर्देशन मानेर चुनाव बहिस्कार गर्लान् कि अर्धाङ्गीनी अमृतालाई जिताउन मतदान गर्लान् ? वली विप्लव निकट शिक्षक संगठनको जिल्ला सदस्य छन् ।

कांग्रेसबाट उम्मेदवार बनेकी उनकी श्रीमती अमृता स्नातक पहिलो वर्षकी विद्यार्थी हुन् । तर, उनी राजनीतिक पृष्ठभूमिकी भने होइनन् । ‘अमृता पहिले कुनै पार्टी वा संगठनमा आबद्ध भएको थाहा थिएन । तर एकाएक उनलाई कांग्रेसले उम्मेदवार बनाएको थाहा भयो,’ सुकिदहका एक कांग्रेस कार्यकर्ताले भने ।

सुकिदहको चुनाव यति कारणले मात्रै चर्चित भएको पनि होइन । अझ रोचक कुरा चाहिँ के छ भने, अमृताका बुवा लिलाधर खत्री भने एमाले समर्थक हुन् । ठूलोबुवा कुलबहादुर खत्री कांग्रेसको राजनीतिमा सक्रिय थिए । पूर्वप्रधान समेत बनेका कुलबहादुरको निधन भइसकेको छ ।

सुकीदह गाउँपालिकामा नेकपा एमालेले निर्मलाकुमारी वलीलाई उपाध्यक्षको उम्मेदवार बनाएको छ । निर्मलाका श्रीमान हिमामणी डाँगी भने वैदेशिक रोजगारीको सिलसिलामा दुबईमा छन् । माओवादी केन्द्रबाट उपाध्यक्षमा रिताकुमारी घर्तीलाई उम्मेदवार बनाएको छ ।

८ कक्षा पढेकी उनी माओवादी केन्द्र सुकिदहकी कोषाध्यक्ष हुन् । तर, उनका बुवा राकेश डिसी भने राप्रपाको राजनीतिमा सक्रिय छन् । सुकिदहका कांग्रेस, एमाले र माओवादीका तीनवटै उम्मेदवारका चुनाबी एजेण्डा भने समान छन् । सुकिदहको विकास, लैंगिक समानता र महिला अधिकारका लागि आफूहरु लागीपर्ने उनीहरु बताउँछन् ।