उपभोत्ता ठग्ने दरबारमार्गका ८ ब्राण्डेड पसलका सञ्चालक पक्राउ

अर्थ र बाणिज्य

काठमाडौैं, १५ कात्तिक । उपभोत्ता ठगेको आरोपमा प्रहरीले दरबारमार्ग र न्यूरोडका ८ ब्राण्डेड पसलका सञ्चालकलाई पक्राउ गरेको छ । पक्राउ पर्नेहरूमा वाच एण्ड सीका राजेश्वर श्रेष्ठ, तिरुपति प्रालिका नन्दन बिहानी, लेवल स्टोलका दितेन्द्र महर्जन र सुवास महर्जनका साथै एडभेञ्चर आउटडोरका रोशन ओडारी रहेका महानगरीय प्रहरी परिसरले जनाएको छ ।

त्यस्तै लाइफ स्टाइल प्रालिका श्रीकृष्ण महर्जन, एभिन्यू मार्केटिङका उत्तमकुमार बस्नेत, प्लेटिनियम ट्रेड कन्सनका प्रविन झा र बेन्टलीका तुलसीधर भण्डारीलाई पनि पक्राउ गरिएको परिसरका प्रवक्ता रामदत्त जोशीले जानकारी दिए ।

बाँकी व्यवसायीका सम्बन्धमा भने अनुसन्धान चलिरहेको परिसरले जनाएको छ । पक्राउ परेका व्यवसायीहरुमाथि कालो बजारी ऐनअन्तर्गत कारवाहीको मुद्धा चलाईने तयारी भईरहेको प्रवत्ता जोशीको भनाई छ ।

आपूर्ति व्यवस्थापन विभागले दुई महिना अघि ब्राण्डेड सप अनुगमन गर्दा ठगी गरेको पाइएपछि दरवारमार्ग र न्यूरोडका एघार ब्राण्डेड सप सिल गरिएका थिए। दरवारमार्गका व्यवसायीले उच्च राजनीतिक तहमा दबाव दिएपछि झण्डै १८ दिनपछि असोज ८ गते पसलको सिल खुलेको थियो।

दरबारमार्गमा रहेको वेन्ट्ले, नाइक, वान स्टोर, पुमा लगायतका पसलबाट तोकिएको भन्दा धैरै गुणा मुनाफा लिएर बिक्री गरेको अनुगमनको क्रममा खुलेको थियो।

आपूर्ति व्यवस्थापन विभागले महानगर प्रहरी परिसरलाई गत महिना कालो बजारी ऐनअन्तर्गत कार्वाहीका लागि जिम्मा लगाएको थियो ।आपूर्ति व्यवस्थापन विभागको निर्देशनमा महानगर प्रहरी परिसरले गत महिनादेखि दरवारमार्गका नौवटा, न्यूरोडको दुईवटा र अन्य चारवटा फर्ममा कारवाहीकालागि अनुसन्धान सुरु गरेको थियो ।