संखुवासभामा एमाले नेता राजेन्द्र गौतमसहितका उम्मेदवार चढेको गाडी एम्बुसमा पर्‍यो

प्रदेश

संखुवासभा, २८ कात्तिक । उम्मेदवार लक्षित गर्दै बम आतंक मच्चाउने क्रम बढेको छ । मंगलबार बिहानै पूर्वमन्त्री तथा एमाले पोलिटव्यूरो सदस्य शेरधन राई चढेको गाडिमा बम प्रहार गर्दा उनका अंग रक्षक घाइते भएका छन् । त्यस्तै संखुवासभामा पनि वाम गठबन्धनका उम्मेदवार चढेको गाडी एम्बुसमा परेको छ । बामगठबन्धनका ४ जना उम्मेदवार चढेको गाडी एम्बुसमा परेको हो । मंगलबार चुनावी सभालाई सम्बोधन गर्नका लागि धुपुबाट बाह्रबिसे जाँदै गरेको गाडी एम्बुसमा परेको हो ।

एम्बुस बिष्फोटका कारण गाडीमा सामान्य क्षति पुगेको संखुवासभा सम्पर्क मञ्चका अध्यक्ष कमल काफ्लेले जानकारी दिए । गाडीमा एमाले नेता तथा प्रतिनिधिसभा उम्मेदवार राजेन्द्र गौतम, प्रदेशसभा तर्फ क बाट उम्मेदवार बनेका पुर्व सभासद् पुर्ण प्रसाद राई, समानुपातिक सभासद् इन्दिरा मिश्र ‘चेतना’, माओवादी केन्द्रका नेता राजेन्द्र कार्की ‘नबिन’ लगायतका नेताहरु सवार थिए ।

बाह्रबिसेमा गठबन्धनले आयोजना गरेको चुनावी सभालाई सम्बोधन गर्न बिहानै त्यसतर्फ हिडेका थिए । उक्त बिष्फोटपछि त्यहाँ केही समय हेलिकोप्टरले गस्ती समेत गरेको छ । बिष्फोट कसले र किन गराएको हो भन्ने बारे केहि जानकारी नभएको र उनीहरुको खोजीकार्य भइरहेको प्रहरीले जनाएको छ ।