सरकार र डा. केसी पक्षबीच शिक्षा मन्त्रालयमा दोश्रो चरणको वार्ता सुरु

बागमती प्रदेश

काठमाडौं ९, साउन । २६ दिनदेखि आमरण अनसनरत डा. गोविन्द केसीले उठाएका विभिन्न मागका विषयमा आज पनि वार्ता सुरु भएको छ । सरकारी पक्ष र डा केसी पक्षबीच शिक्षा मन्त्रालयमा सुरु भएको हो ।

वार्तामा केही बुँदा अध्यादेश अनुसार नै थप गर्ने र केहीमा हेरफेर गर्ने सहमति हुने बताइएको छ ।

हिजोको वार्ता धेरै कुरा सहमति नजक पुगेको जनाइएको थियो। डा. केसीको वार्ता टोलीले संसदमा विचाराधीन चिकित्सा शिक्षा विधेयक फिर्ता गर्नुपर्ने पूर्वशर्त छाडेपछि सरकारी टोलीसँग छलफल सुरू भएको थियो।

आजको वार्तामा विधेयकमा हटाइएका प्रमुख विषयहरु काठमाडौं उपत्यकामा १० वर्ष नयाँ मेडिकल नखोल्ने, एउटा विश्वविद्यालयले पाँचभन्दा बढी मेडिकल कलेजलाई सम्बन्धन नदिने, सम्बन्धनका लागि ३ सय शैय्याको अस्पताल कम्तीमा ३ वर्षसम्म सञ्चालन भएको हुनुपर्ने, सरकारी मेडिकल कलेजमा ७५ प्रतिशत सिट निःशुल्क हुनुपर्ने लगायत विषयमा छलफल हुनेछ ।

हिजो नेम्वाङले केदारभक्त माथेमा र मेडिकल काउन्सिलका धर्मकान्त बास्कोटासँग छलफल गरेपछि प्रधानमन्त्री केपी शर्मा ओली र नेकपाका अध्यक्ष पुष्पकमल दाहाल प्रचण्डसँग छलफल गरेका थिए। त्यसपछि मात्रै सरकारी टोली र डा केसी पक्षबीच वार्ता हुने वातावरण बनेको थियो ।