परीक्षा स्थगित गरेकोप्रति अखिल क्रान्तिकारीको आपत्ती ,माग्यो पदाधिकारीको राजिनामा

बागमती प्रदेश

काठमाडाैं २१,साउन । सीटीईभिटीले सोमबार (आज) हुन लागेको प्रवेश परीक्षा स्थगित गरेको प्रति अखिल क्रान्तिकारीले आपत्ति जनाएको छ ।

सोमबार विज्ञप्ति जारी गरेर रातारात षड्यन्त्र पूर्णरुपमा प्राविधिक एसएससी तर्फको पूर्ण शूल्कीय प्रवेश परीक्षा स्थगित गरेर विद्यार्थीको भविष्यमाथि खेलवाड गरेको अखिल क्रान्तिकारीले जनाएको छ ।

नेपाल कम्युनिस्ट पार्टी निकट अखिल क्रान्तिकारीको सीटीईभिटी समन्वय समिति संयोजक हर्कबहादुर बिकले विज्ञप्ति जारी गरेर पारदर्शी र व्यवस्थितरुपमा प्रवेश परिक्षा सञ्चालन गर्न हैसियत नराखेको भन्दै सीटीईभिटीको उपाध्यक्ष कुलबहादुर बस्नेत, सदस्य सचिव पुष्परमण वाग्ले र परीक्षा नियन्त्रक मणी भट्टराईको राजिनामा मागेका छन् । उनले विद्यार्थी तथा शैक्षिक संस्थाहरुलाई अनिर्णयको बन्दी बनाएको भन्दै संगठनले कारवाही गर्ने समेत चेतावनी दिएका छन् ।

‘पारदर्शी र व्यवस्थितरुपमा प्रवेश परीक्षा सञ्चालन गर्ने हैसियत नराख्ने सीटीर्इभिटीका उपाध्यक्ष कुलबहादुर बस्नेत, सदस्य सचिव पुष्परमण वाग्ले र परीक्षा नियन्त्रक मणी भट्टराईलाई पदबाट राजिनामा गर्न जोडदार माग गर्दछौं । निहित स्वार्थका लागि सीटीर्इभिटी र सम्पूर्ण विद्यार्थी तथा शैक्षिक संस्थालाई अनिर्णयको बन्दी बनाउने कार्य गर्ने जोसुकै ब्यक्ति तथा पदाधिकारीहरु संगठनको कारबाहीमा पर्ने समेत चेतावनी दिन चाहन्छौं” विज्ञप्तिमा भनिएको छ ।

त्यसैगरी, संयोजक बिकले डिप्लोमा तहको वर्गीकृत छात्रवृत्ति अन्तर्गत धनगढी, जनकपुर लगायतका परीक्षा केन्द्रमा प्रश्नपत्र बाहिरिएको र त्यसको छानबिनले निष्कर्ष नआउँदै प्रवेश परीक्षा स्थथित गरेर घृणित कार्य गरेको बताएका छन् ।

विद्यार्थीको भविश्यसँग खेलवाड भएको भन्दै संयोजयक बिकले विज्ञप्तिमा भनेका छन्, ‘प्राविधिक क्षेत्रतर्फ गन्तब्य बनाएका हजारौं बिद्यार्थीहरुको भबिष्यसँग सम्बन्धित प्रवेश परीक्षाजस्तो संवेदनशील बिषयमा खेलवाड गर्ने–गराउने सीटीर्इभिटीको गैरजिम्मेवारपूर्ण रबैयाको कडा संघर्ष र प्रतिरोध गर्न आम बिद्यार्थी वर्गलगायत सम्बन्धित सबैमा हार्दिक अपिल गर्दछौं । साथै तुरुन्तै पारदर्शी ढङ्गले प्रबेश परिक्षा सञ्चालन गर्न जोडदार माग गर्दछौं ।”

संयोजक बिकले राज्यका शैक्षिक निकायहरु विद्यार्थीहरुको हितको पक्षमा न्युनतम समझदारी पनि कायम नगरी सीटीर्इभिटीको प्रवेश परीक्षा र एसईईको पुरक परीक्षाको तालमेल नमिल्दा समेत हजारौं विद्यार्थी पीडित हुनु परेको भन्दै निन्दा गरेका छन् ।

सीटीईभिटीले यसअघि सोमबार दिउँसो २ बजे प्रवेश परीक्षा तोकेको थियो ।