विप्लव समूहका ३१७ नेता तथा कार्यकर्ता पक्राउ

समाचार

काठमाडौं ।

सरकारले नेकपा ‘विप्लव’ समूहका गतिविधिमाथि प्रतिबन्ध लगाएपछि सुरक्षा निकाय निकै सक्रिय बनेको छ । सरकारको निर्देशनबमोजिम सुरक्षा निकायले सो समूहका नेता कार्यकताहरु धमाधम पक्राउ गर्न थालेको छ ।

प्रधानमन्त्री केपी ओलीले मानिस मार्ने, बम पड्काउने, चन्दा आंतक मच्चाउनेलाई कुनै हालतमा नछाड्ने अडान लिंदै आएका थिए । सरकारको अडान बमोजिम सुरक्षा कारबाही तिब्र पारिएको हो ।

हालसम्ममा प्रहरीले आपराधिक गतिविधिमा संलग्न विप्लव समूहका ३१७ जनालाई पक्राउ गरिसकेको छ । विप्लव समूहका उच्च तहका नेता पक्राउ गर्न पनि प्रहरी सफल भएको छ ।

नख्खुस्थित एनसेलको कार्यालय अगाडि एकजनाको ज्यान जाने गरि गत फागुन १० गते भएको बम विस्फोटको जिम्मा विप्लव समूहले लिएपछि सुरक्षा निकायले गोप्य छानबिन शुरु गरेको थियो ।

सोहि क्रममा सुरक्षा निकायले नेकपाको मध्य कमाण्ड इञ्चार्ज हेमन्तप्रकाश वली ‘सुदर्शन’ सहित दर्जनौं नेता कार्यकर्ता पक्राउ गरेको छ । वली विप्लव नेकपाभित्रका तेस्रो वरियताका नेता हुन् ।

योभन्दा अगाडि नै सरकारले विप्लब समूहका पोलिटब्यूरो सदस्य मोहन कार्की, केन्द्रीय सदस्य बसन्त श्रेष्ठ, कोशी ब्युरो इञ्चार्ज घनश्याम श्रेष्ठ र मोरङ जिल्ला इञ्चार्ज कृष्णकुमार श्रेष्ठलाई पक्राउ गरिसकेको थियो ।

यसैगरि नवलपरासी इञ्चार्ज गंगा ज्ञवाली, कालिकोट जनसरकार प्रमुख धनराज शाही, अखिल नेपाल किसान महासंघ (क्रान्तिकारी)का संयोजक राजु कार्कीसहित ३१७ जनालाई सुरक्षा निकायले पक्राउ गरी कारवाही थालेको थियो । कारवाहीका क्रममा पक्राउ परेकामध्ये ५० जना छुटेको र १६४ जना अहिले पनि हिरासतमा रहेको प्रहरीले जानकारी दिएको छ ।