कांग्रेसमा विवादः संस्थापन पक्ष र पाैडेल पक्षको छुट्टाछुट्टै बैठक

राजनीति

- न्युज-नेपाल

काठमाडाैँ । नेपाली कांग्रेसका संस्थापन पक्ष र पाैडेलपक्षको बैठक छुट्टाछुट्टै स्थानमा बस्न लागेको छ।

केन्द्रीय समिति बैठक दिउँसो २ बजे केन्द्रीय कार्यालयमा बोलाइएको छ। केन्द्रीय कार्यालयमा संस्थापन पक्षका केन्द्रीय समिति सदस्यहरूको बैठक हुने भएको छ।

संस्थापन पक्षको निर्णयबाट रुष्ट वरिष्ठ नेता रामचन्द्र पौडेल पक्षले महामन्त्री डा शशांक कोइराला निवास महाराजगञ्जमा बैठक गर्दैछन्। पौडेल पक्षले दिउँसो ३ बजेका लागि बैठक बोलाएको छ।

राष्ट्रिय सभा सदस्य निर्वाचनको विषयमा छलफल गर्नका लागि केन्द्रीय समितिको बैठक बोलाइएको छ। पौडेल पक्षले पुस ११ मा संस्थापन पक्षले बहुमतको आधारमा गरेका निर्णयहरू नसच्चाएसम्म बैठकमा उपस्थित नहुने प्रष्ट्याइसकेको छ। सभापति शेरबहादुर देउवाले बुधबार बोलाएको पदाधिकारी बैठकमा समेत संस्थापनइतरका नेताहरु उपस्थित भएनन्।

सभापति देउवाले राष्ट्रिय सभा सदस्यको निर्वाचनका बारेमा छलफल गर्न पदाधिकारी बैठक बोलाएका थिए। बुधबारको बैठकमा पदाधिकारी बैठकमा वरिष्ठ नेता पौडेल र नेता कृष्ण प्रसाद सिटौलालाई पनि बोलाइएको थियो।

महाधिवेशनको कार्यतालिका,भ्रातृ संस्थामा नेतृत्व बाँडफाड, विभाग गठन, क्रियाशील सदस्यतको नाम र संख्या लगायतका विषयमा दुई पक्षबीच विवाद छ। विवादकै कारण मंसिर २६ बाट बोलाइएको बैठकमा संस्थापनइतरका केन्द्रीय सदस्यहरू अनुपस्थित रहँदै आएका छन्।

पार्टी भित्रको विवाद अन्त्यको लागि बनाइएको कार्यदलमा सहमति हुन नसकेपछि संस्थापन पक्षले बहुमतको आधारमा पुस ११ मा निर्णय सार्वजनिक गरेको थियो।