इटलीको अदालतमा परेको दुई अर्बको मुद्दा इन्भेष्टमेन्ट बैंकले जित्यो

काठमाडौं। नेपाल इन्भेष्टमेन्ट बैंकले २ अर्ब चार करोड रुपैयाँको मुद्दा जितेको छ।

इटलीको अदालतमा परेको तनहुँ हाइड्रोपावर सम्बन्धि मुद्दामा १६ महिनापछि नेपाल इन्भेष्टमेन्ट बैंकले न्याय पाएको हो।

‘हामीले अहिले भर्खर मुद्दा जित्यौं। अब देशको २ अर्ब रुपैयाँभन्दा बढी पैसा फिर्ता गराउन हामी त्यहाँको बैंकसँग दाबी गर्छौं,’ बैंकका प्रमुख कार्यकारी अधिकृत ज्योति पाण्डेले बिजमाण्डूसँग भने, ‘यसबाट बैंकको वासलात थप सुदृढ र बलियो बन्ने छ।’

तनहुँ जलविद्युत परियोजनामा ठेकेदार कम्पनी मुराटोरी इ केमेन्टिस्टी (सीएमसी) ले कार्यसम्पादनका लागि ग्यारेन्टी दिएको थियो। तर कम्पनीले भने अनुसार काम गरिरहेको थिएन।

कम्पनीले काम नगरेपछि तनहुँ हाइड्रोले ग्यारेन्टीवापतको रकम बैंकसँग दाबी (क्लेम) गरेको थियो। उत्तिनै बेला इन्भेष्टमेन्ट बैंकले दाबी भुक्तानी गरिदिएको थियो।

सीएमसीले आफ्नो जमानत जफत भएको भन्दै इटालीको स्थानीय अदालतमा मुद्दा हालेको थियो। अदालतको एकल इजलासले सुरुमा इन्भेष्टमेन्ट बैंकलाई हराइदिएको थियो। बैंकको तर्क नसुनी एकपक्षीय निर्णय भएको भन्दै इन्भेष्टमेन्ट बैंकले पुनरावेदन गरेको थियो।

कोभिड-१९ का कारण मुद्दाको फैसला ढिलाइ भइरहेको थियो। अन्ततः तीन न्यायाधीशको संयुक्त इजलासले बैंकको पक्षमा फैसला गरिदिएको हो।

सीएमसीले नेपाल इन्भेष्टमेन्ट बैंक, तनहुँ हाइड्रोका साथै इटालीस्थित इन्टेसा सानपाउलो बैंकलाई मुद्दा हालेको थियो। मुद्दा परेपछि इटलीको बैंकले नेपाल इन्भेष्टमेन्ट बैंकले तनहुँ हाइड्रोपावरलाई भुक्तानी गरेको रकम फिर्ता गरेको थिएन।

बैंकले नेपाली र युरोमा कार्य सम्पादन ग्यारेन्टी दिएको थियो। बैंकले ८५ करोड १४ लाख १६ हजार रुपैयाँ र ८७ लाख ४९ हजार युरो (एक अर्ब १९ करोड रुपैयाँ हाराहारी) ग्यारेन्टी दिएको थियो।

‘अब हामी इटालीको बैंकलाई तत्काल पैसा भुक्तानी गर्न भन्छौं,’ पाण्डेले भने, ‘यसले बैंकको पैसा मात्र फर्किने होइन देशकै पैसा फर्किन्छ।’

ग्यारेन्टी वापतको पैसा डुबेपछि इन्भेष्टमेन्ट बैंक राष्ट्र बैंकको प्रावधान अनुसार नोक्सानी ब्यवस्थापन (प्रोभिजनिङ) गर्नुपर्ने दबाबमा थियो। यही कारण बैंकको खराब ऋणमा बढ्ने अवस्था थियो। अब बैंकलाई यो दबाब हुने छैन।

‘उनीहरुले स्टे-अर्डर मार्फत हाम्रो पैसा रोकेका थिए। हामीले मुद्दा जितिसकेको अवस्थामा आजै हामीले पैसाका लागि क्लेम गरिसकेका छौं,’ पाण्डेले भने, ‘अब त्यहाँको बैंकलाई पैसा पठाउन कर लाग्छ।’

उनले यति ठूलो रकमको बैंक ग्यारेन्टीमा मुद्दा जित्दा देशकै पैसा फर्किने अवस्था आएको समेत बताए। मुद्दा लड्नका लागि बैंकले वकिलहरु बोकेर धेरैपटक इटाली धाउनु परेको थियो। मुद्दा लड्न मात्रै बैंकको करिब करिब ४ करोड रुपैयाँ खर्च भएको छ।

Comments