सभापति देउवाले भनेः आन्दोलन गर्न हामीसँग पैसा छैन, जबरजस्ती बोलाउन सक्दैनौं

राजनीति

- न्युज-नेपाल

काठमाडाैँ । नेपाली कांग्रेसका सभापति शेरबहादुर देउवाले अदालतको निर्णय नआउँदासम्म आफ्नो पार्टीले कुनै कदम नचाल्ने बताएका छन् ।

नेपाल मगर संघ गण्डकीको प्रथम सम्मेलनलाई बिहीबार पोखरामा सम्बोधन गर्दै बिहीबार सभापति देउवाले अदालतले संसद् पुनर्स्थापना वा चुनाव जुन पक्षमा फैसला गर्छ कांग्रेस त्यसैकै पक्षमा रहने बताएका हुन् ।

`प्रधानमन्त्री केपी ओलीले संसद् विघटन गरेर देश दुर्घटनातर्फ धकेलेका छन् । यो ठीक हो/होइन अदालतले फैसला गर्छ,´ उनले भने, `यसबारे अदालतले जे फैसला गर्छ, हामी त्यसैको पक्षमा हुन्छौं ।´

नेकपा प्रचण्ड-नेपाल समूहले गरिरहेको प्रदर्शनबारे बोल्दै देउवाले पैसा हुनेले टाढा-टाढाबाट कार्यकर्ता बोलाउन सम्भव भए पनि आफूहरूसँग त्यो हैसियत नभएको बताए ।

पैसा नहुँदा आफ्ना क्रियाशील सदस्य पनि जुलुसमा नआउने भन्दै उनले व्यङ्ग्य गरे । `हामी त्यति जुलुस निकाल्न सक्दैनाैं, किनकि हामीसँग पैसा छैन,´ उनले भने, `क्रियाशील लिनेबेला मारामार हुन्छ, जुलुसमा क्रियाशील पनि आउँदैनन् ।´