प्रधानमन्त्री ओलीलाई पम्फा भुषालको प्रश्नः जिताहा शासक जस्तो गरेर हिँड्ने ?

राजनीति

- न्युज-नेपाल

काठमाडाैँ । नेकपा माओवादी केन्द्रले प्रधानमन्त्री केपी शर्मा ओलीको राजीनामा माग गरेको छ ।

सर्वोच्च अदालतले प्रतिनिधि सभा पुनःस्थापना गरिदिँदा पनि प्रधानमन्त्री जिताहा शासकजस्तो गरेर हिँड्ने गरेको माओवादीको आरोप छ ।

शुक्रवार बसेको प्रतिनिधि सभा बैठकमा अधिवेशन आह्वानको अवसरमा मन्तव्य राख्दै माओवादीकी प्रभावशाली नेतृ एवं सांसद पम्फा भुसालले सर्वोच्चले प्रतिनिधि सभा पुनःस्थापना भएपछि नैतिकताको आधारमा राजीनामा गर्नुपर्ने बताएकी हुन् ।

‘नैतिकताको विषय हो भने राजनीतिमा मूल्य हुन्छ । मैले सोचेकी थिएँ, फागुन ११ गतेको फैसलापछि त्यो राजनीतिक नैतिकताको पालना गरिने छ । अहिले पनि बढो जिताहा शासक जस्तो गरेर हिँड्ने कुराले आम नागरिकमा के पर्छ होला ? जिम्मेवारी नलिने राजनीतिज्ञका कारण राजनीति बदनाम छ,’ भुसालले भनिन् ।

नेतृ भुसालले प्रतिनिधि सभा विघटन सही थियो भनेर गतल कामको पुष्टि गर्नुभन्दा सच्चिएर अगाडि बढ्न अपिल गरिन् । ‘चुनाव रे, आफूले भनेजस्तो नहुँदा । सम्माननीय प्रधानमन्त्रीज्यू तपाईंले जनतालाई भ्रममा दिनुभएको छ । अहिलेको निर्वाचन प्रणालीमा बहुमत आउँदैन, दुईतिहाइको भ्रम छरेर लाज छोप्ने कुरा नगर्नुस्,’ उनले भनिन् ।

माओवादीले एसिड आक्रमणविरुद्धको अध्यादेशमा आफूहरूको विरोध नरहेको स्पष्ट गर्‍यो । ‘एसिड आक्रमणविरुद्धको अध्यादेशको कसैले विरोध गरेको छैन, संवैधानिक परिषद्सम्बन्धी अध्यादेशको विरोध गरेका हौं ।

कार्यव्यवस्था परामर्श समितिमा बिजनेस दिन नसक्ने अनि सभामुखलाई गाली गर्दै हिँड्ने काम बन्द होस्,’ भुसालले भनिन् ।