उत्तर कोरियाले रुसी भाडाका सैनिकलाई क्षेप्यास्त्र दिएकै हो ?

विश्व प्रवास

- न्यूज नेपाल

किएभ । युक्रेनमा प्रयोग गर्नका लागि रुसी भाडाका सैनिकहरूको समूह वाग्नर समूहलाई उत्तर कोरियाले युद्ध क्षेत्रमा प्रयोग हुने क्षेप्यास्त्र र रकेटहरू उपलब्ध गराएको अमेरिकाले आरोप लगाएको छ । ह्वाइट हाउसले उक्त कारोबारले संयुक्त राष्ट्रसंघको सुरक्षा परिषद्को प्रस्तावको उल्लंघन गरेको जनाउँदै वाग्नर समूहमाथि थप प्रतिबन्धहरूको घोषणा गर्ने जनाएको छ । तर उत्तर कोरिया र वाग्नर समूहले भने उक्त विवरण अस्वीकार गरेका छन् ।

यूके सरकारका अनुसार युक्रेनमा वाग्नर ग्रुपका सैनिकको संख्या १ हजारबाट बढेर झन्डै २० हजार पुगेको छ । हालसालै सिरिया र अफ्रिकी देशहरूमा पनि सक्रिय रहेको उक्त समूहमाथि पटक–पटक युद्ध अपराध र मानव अधिकार उल्लंघनको आरोप लाग्ने गरेको छ । ‘युक्रेनमा आफ्नो सैन्य कारबाहीलाई सहयोग गर्न वाग्नरले विश्वभर हतियार आपूर्तिकर्ताको खोजी गरिरहेको छ,’ ह्वाइट हाउस राष्ट्रिय सुरक्षा प्रवक्ता जोन कर्बीले सञ्चारकर्मीहरूलाई भने ।

‘हतियारका लागि रकम तिरेको वाग्नर समूहलाई उत्तर कोरियाले केही मात्रामा हतियार उपलब्ध गराएको हामी अब पुष्टि गर्न सक्छौँ,’उनले थपे । एउटा चुहिएको फुटेजमा वाग्गनरका नेता येभ्गेनी प्रिगोजिनले रुसमा बन्दीहरूलाई सम्बोधन गरेको देखिन्छ । वाग्गनरका नेता येभ्गेनी प्रिगोजिनले रुसमा बन्दीहरूलाई सम्बोधन गरेको चुहिएको एउटा भिडिओ फुटेजमा देखिएको थियो । ह्वाइट हाउसका अनुसार उक्त समूहले उत्तर कोरियाबाट स्थल सेनाले प्रयोग गर्ने रकेट र क्षेप्यास्त्र खरिद गरेको छ ।

कर्बीका अनुसार वाग्नरले युक्रेनमा मासिक १० करोड अमेरिकी डलर भन्दा बढी रकम खर्च गरिरहेको छ । यूकेका विदेश मन्त्री जेम्स क्लेभर्लीले आफूहरू उनको मूल्यांकनमा सहमत रहेको जनाएका छन् । ‘राष्ट्रपति (भ्लादिमिर) पुटिनले मद्दत माग्न उत्तर कोरियातर्फ फर्केको यथार्थ रुसको निराशा र एक्लोपनको सङ्केत हो,’ यूके विदेशमन्त्रीले एक विज्ञप्तिमा भने ।

तर वाग्नरका समूहका सञ्चालकले भने त्यसलाई हल्ला र अनुमानको’ संज्ञा दिँदै उक्त दाबीलाई अस्वीकार गरेका छन् । उत्तर कोरियाको विदेश मन्त्रालयले उक्त विवरण निराधार रहेको जनाएको छ । उत्तर कोरियाका एक जना प्रवक्ताले आफ्नो देश र रुसबिच कारोबार कहिल्यै नभएको र आफूहरूको भनाइ परिवर्तन नहुने बताएका छन् ।

सन् २०१४ मा रुसले क्राइमियालाई आफ्नो भूभागमा गाभ्ने क्रममा वाग्नर समूहले पहिलो पटक त्यहाँको युद्धमा सहभागिता जनाएको विश्वास गरिन्छ । पश्चिमा राष्ट्रका विज्ञहरूका अनुसार वाग्नर समूह रुसद्वारा प्रायोजित भाडाका सैनिकहरूको समूह हो । त्यसमा आबद्ध लडाकुहरू क्रेम्लिनको स्वार्थमा काम गर्छन् ।

उक्त निजी सैन्य कम्पनीको स्थापना भूतपूर्व रेस्टुराँ व्यवसायी येभ्गेनी प्रिगोजिनले गरेका हुन् । उनलाई रुसी राष्ट्रपति भ्लादिमिर पुटिनका निकट सहयोगी मानिन्छ । उनीमाथि बारम्बार युद्ध अपराध र मानवाधिकार उल्लङ्घनको आरोप लाग्ने गरेको छ । वाग्नरले यसअघि क्राइमिया, सिरिया, लिबिया, माली र सेन्ट्रल अफ्रिकन रिपब्लिकमा सैनिकहरू पठाएको थियो ।-बीबीसी