प्रधानमन्त्रीको चीन भ्रमण सेप्टेम्बरमा

समाचार

- न्युज नेपाल

कैलाली । परराष्ट्रमन्त्री एनपी साउदले प्रधानमन्त्री पुष्पकमल दाहाल ‘प्रचण्ड’ आगामी सेप्टेम्बरमा चीन भ्रमणमा जाने बताएका छन्।

सोमबार कैलालीमा भएको एक कार्यक्रममा बोल्दै उनले प्रधानमन्त्रीको चीन भ्रमण फलदायी, महत्वपूर्ण र सार्थक हुने बताएका हुन्। उनले भने, ‘प्रधानमन्त्री प्रचण्डको चीन भ्रमण महत्वपूर्ण र सार्थक हुने कुरा म तपाईंहरुलाई विश्वास दिलाउन चाहन्छु।’ यस अगाडि शनिबार प्रधानमन्त्री प्रचण्डले पनि आफू छिट्टै चीन भ्रमणमा जाने जानकारी दिएका थिए।

प्रचण्डले भनेका थिए, ‘राष्ट्र र जनताप्रति इमानदार भएर काम गरिरहेको छु। छिट्टै चीन भ्रमण हुँदैछ, त्यसको तयारी भएको छ।’ यसैगरी मन्त्री साउदले नेपाल कुनै पनि मुलुकको सैनिक गठबन्धनमा नभएको बताए। उनले सैनिक गठबन्धनमा नेपाल तटस्थ रहेकोसमेत स्पष्ट पारे। परराष्ट्रमन्त्री साउदले प्रधानमन्त्रीको भारत भ्रमणबाट मुलुकले ऐतिहासिक उपलब्धि हासिल गरेको उल्लेख गरे। साउदले आफू आज राति अजरबैजान जानेसमेत जानकारी दिए।