फिफा महिला विश्वकप :पहिलो उपाधिको खोजीमा स्पेन र इंग्ल्यान्ड

काठमाडौं । फिफा महिला विश्वकपको फाइनलमा आज (आइतबार) स्पेन र इंग्ल्यान्ड मैदान उत्रिँदा दुवै टिम पहिलो उपाधिको लक्ष्यमा हुनेछन् ।

महिला विश्वकपको इतिहासमा दुवै टिम पहिलो पटक फाइनलसम्म पुगेका हुन् । अमेरिका र जर्मनीमध्ये कुनै एक टिमले फाइनलमा स्थान बनाउन नसकेको यो पहिलो पटक हो ।

गत वर्ष सम्पन्न महिला युरोपियन च्याम्पियनसिपको विजेतासमेत रहेको इंग्ल्यान्ड जारी विश्वकपमा अपराजित छ । फाइनलमा ‘जायन्ट किलर’ को छवि बनाएको स्पेनविरुद्ध मैदान उत्रिँदा इंग्ल्यान्ड सोही लयलाई निरन्तरता दिने लक्ष्यमा हुनेछ ।

यता, समूह चरणको अन्तिम खेलमा जापानसँग ४–० को फराकिलो हारका बावजुद फाइनलसम्मको यात्रा तय गर्दा स्पेनले कुल १७ गोल गरेको छ ।

अस्ट्रेलियाको सिड्नीस्थित अस्ट्रेलिया रंगशालामा हुने खेल नेपाली समयअनुसार दिउँसो ३ः४५ बजेदेखि सुरु हुनेछ ।

स्पेन र इंग्ल्यान्ड फाइनल यात्रा

इंग्ल्यान्ड
सन् १९९५ को संस्करणमा डेब्यु गरेको इंग्ल्यान्डले २००७, २०११, २०१५ र २०१९ गरी पाँचपटक विश्वकप खेलिसकेको छ । इंग्ल्यान्डले यसअघिका लगातार दुई संस्करणमा सेमिफाइनलमा स्थान बनाएको थियो ।

सन् २०१५ मा तेस्रो र २०१९ मा चौथो भएको इंग्लिस टिमले हालसम्म फाइनलमा स्थान बनाउन सकेको छैन । २०१५ मा तेस्रो स्थान हासिल गर्नु नै इंग्ल्यान्डको अहिलेसम्मकै सबैभन्दा उत्कृष्ट नतिजा हो ।

समूह ‘डी’को विजेताका रूपमा प्रि–क्वार्टरफाइनलमा आएको इंग्ल्यान्डले अन्तिम–१६ को खेलमा नाइजेरियालाई पेनाल्टी सुटआउटमा ४–२ ले हराएको थियो ।

इंग्ल्यान्डले क्वार्टरफाइनलमा कोलम्बियालाई २–१ ले र सेमिफाइनलमा घरेलु टिम अस्ट्रेलियाको चुनौती ३–१ ले पन्छाउँदै उपाधिका लागि स्पेनसँगको भेट पक्का गरेको थियो ।

स्पेन
महिला विश्वकपमा स्पेनको इतिहास लामो छैन । सन् २०१५ को संस्करणमा डेब्यु गरेको स्पेनको यो तेस्रो सहभागिता हो । विश्व महिला फुटबलमा पछिल्लो समय स्पेन घरेलु लिगका कारण चर्चित छ ।

स्पेन पहिलोपटक विश्वकपको क्वार्टरफाइनलमा पुगेको हो । गत संस्करणमा प्रि–क्वार्टरफाइनलसम्मको यात्रा तय गर्नु नै स्पेनको यसअघिको उत्कृष्ट नतिजा थियो ।

स्पेन समूह ‘सी’को उपविजेताका रूपमा अन्तिम–१६ मा प्रवेश गरेको थियो । क्वार्टरफाइनलमा स्थान बनाउने क्रममा स्पेनले स्वीट्जरल्यान्डलाई ५–१ ले हरायो ।

अन्तिम–८ मा नेदरल्यान्ड्सको चुनौती २–१ ले पन्छाएको स्पेनले सेमिफाइनलमा विश्वकपको सदाबहार दाबेदार स्वीडेनलाई २–१ ले हराउँदै पहिलो पटक फाइनलमा स्थान बनाएको थियो ।

Comments