काठमाडौं महानगरले ४ हजार युवालाई साइबर सेक्युरिटी तालिम दिने

समाचार

- न्यूज नेपाल

काठमाडौं । काठमाडौं महानगरपालिकाले चार हजार युवालाई साइबर सेक्युरिटी तालिम दिने भएको छ । ‘रोजगारी र आयवृद्धि, काठमाडौंको समृद्धि’ योजनाअन्तर्गत महानगरपालिकाले चार हजार युवालाई साइबर सेक्युरिटीसम्बन्धी तालिम प्रदान गर्न लागेको हो ।

महानगरको शहरी योजना आयोगका सदस्य इन्जिनियर शैलेन्द्र झाका अनुसार साइबर सुरक्षा क्षेत्रमा काम गर्न इच्छुक विद्यार्थी र पेशाकर्मीलाई तालिम दिइनेछ । तालिममा साइबर जोखिमबाट बच्ने ज्ञान र सिप सिकाइने उनको भनाई छ ।

‘गएको वर्ष नेपालमा ५९ प्रतिशत साइबर अपराध बढेको प्रतिवेदनहरुले देखाएका छन् । यस प्रकारका अपराध नियन्त्रण गर्न बलियो र दक्ष साइबर सुरक्षाका लागि तालिमले योगदान दिनेछ,’ उनले भने । इन्टरनेटको पहुँच बढेसँगै साइबर सुरक्षाको चुनौती पनि बढेको उनी बताउँछन् । स्मार्ट फोन चलाउने सर्वसाधारणलाई पनि इन्टरनेटमा आधारित सुरक्षा दिइनुपर्नेमा उनको जोड छ ।

‘व्यक्तिका व्यक्तिगत सूचनाहरु थाहा नपाइ अरुले दुरुपयोग गरिरहेको हुन सक्छन् । कहिलेकाँही सरकारको प्रणालीमा पनि समस्या आउने गरेको सुनिन्छ । इन्टरनेटमा आधारित जोखिमबाट नागरिकलाई बचाउन अहिले काम गर्नुपर्नेछ । हामीले यसको थालनी गरेका हौं,’ झाले भने । महानगरपालिकाले माघ २ गते दिउँसो २ बजेदेखि प्रदर्शनी मार्गस्थित राष्ट्रिय सभा गृहमा तालिम आयोजना गरिने जानकारी दिएको छ ।