मौलिक पुख्र्यौली नाच प्रतियोगिता

काठमाडौं । म्याग्दीको अन्नपूर्ण गाउँपालिका–२ भुरुङ तातोपानीमा शनिबार सम्पन्न सर्वाधिक पुरस्कार राशिको मौलिक पुख्र्यौली नाच प्रतियोगितामा अन्नपूर्ण–८ काफलडाँडाको समूह विजयी भएको छ । तीन दिनसम्म सञ्चालन भएको १२ समूहले सहभागिता जनाएको प्रतियोगितामा वडा नं १ दोवा दोस्रो र भुरुङ तातोपानी मैत्री समाज पोखरा तेस्रो भएका छन् ।

तीनवटै समूहलाई अन्नपूर्ण गाउँपालिकाका अध्यक्ष भारतकुमार पुन, प्रमुख प्रशासकीय अधिकृत अमृत सुवेदी, वडाध्यक्ष ओमप्रकाश फगामी लगायतले क्रमश नगद रु ७५ हजार, ६० हजार र ४५ हजारका दरले पुरस्कार वितरण गर्नुभयो । मादलमा अन्नपूर्ण गाउँपालिका–७ रिमा, मारुनीमा वडा नं ५ शिख, हाइमार्ने (लामो स्वर निकाल्ने) मा पाउद्वार, भाका लय र शब्दमा काफलडाँडा, पोसाकमा वडा नं–४ नारच्याङ उत्कृष्ट भए भने वडा नं २ भुरुङ तातोपानीले अनुशासित समूहको उपाधी पाएका छन् ।

प्रतिभा पुन, डम्मर पुर्जा र लालबहादुर पुनको निर्णायक मण्डलले नृत्यको मूल्याङ्कन गर्नुभएको थियो । पुन, मगर समुदायको मौलिक संस्कृतिको रुपमा रहेको पूख्र्यौली नाचको संरक्षण र प्रचारप्रसारका लागि भूमे पुजाको अवसरमा भुरुङ तातोपानीको वडा कार्यालयले पुख्र्यौली नाच प्रतियोगिता आयोजना गरेको हो ।

‘पुख्र्यौली नाच पुन, मगर समुदायमा पूर्खैँदेखि चलिआएको पाइन्छ, पछिल्लो समय यो नाच युवा पुस्ताले अगाडि बढाउन नसक्दा हराएर जाने जोखिम बढेको थियो,’ प्रतियोगिताका मूल संयोजक समेत रहेका वडाध्यक्ष ओमप्रकाश फगामीले भन्नुभयो ‘नयाँ पुस्तालाई संस्कृति हस्तान्तरण गर्ने माध्यमका रुपमा प्रतियोगिता आयोजना गरिएको हो ।’

प्रतियोगितामा सहभागी पुख्र्यौली नाचमा अन्नपूर्ण गाउँपालिकाका विभिन्न वडाका जनप्रतिनिधि, आमा समूह, युवायुवती, बालबालिका र वृद्धवृद्धासमेतले सहभागिता जनाएका थिए । अन्नपूर्ण गाउँपालिकाले रु तीन लाख विनियोजन गरेको प्रतियोगिता सञ्चालन गर्न स्वदेश तथा विदेशमा रहेका भुरुङ– तातोपानीवासीको नेतृत्वमा रु १९ लाख सहयोग जुटेको छ ।

अन्नपूर्ण गाउँपालिका अध्यक्ष भारतकुमार पुनमगरले समुदायको सांस्कृतिक पहिचानको रुपमा रहेको पूख्र्यौली नाच अन्तरपुस्ता हस्तान्तरणको लागि प्रतियोगिताले सहयोग पुग्ने बताउनुभयो । उहाँले आगामी वर्षको नीति तथा कार्यक्रममा कला संस्कृति र सांस्कृतिक क्षेत्रलाई प्राथमिकतामा राखिने बताउँदै मौलिक कला र संस्कृतिको विकास, प्रवद्र्धन र प्रचारप्रसार गरिने बताउनुभयो ।

गाउँपालिकाका प्रमुख प्रशासकीय अधिकृत अमृत सुवेदीले पर्यटकीय सम्भावनाले भरिपूर्ण अन्नपूर्ण गाउँपालिकामा रहेका कला र संस्कृतिलाई सांस्कृतिक पर्यटनको माध्यमबाट स्थानीयको आयआर्जन वृद्धि र जीवनस्तर सुधारमा गाउँपालिकाले जोड दिएको बताउनुभयो । अन्नपूर्ण गाउँपालिका स्थापना भएपछि पहिलो पटक आयोजना गरिएको पुख्र्यौली प्रतियोगिताले भुरुङ गाउँमा सांस्कृतिक उत्सव छाएको थियो ।

Comments

• news-nepal