नोबेल पुरस्कार विजेता साहित्यकार एलिस मुनरोको निधन

विश्व प्रवास

काठमाडौं ।नोबेल पुरस्कार विजेता लेखक एलिस मुनरोको निधन भएको छ । कथ्य–शैलीका कारण द क्यानडियन चेखब का रूपमा समेत परिचित मुनरोको मंगलबार निधन भएको हो ।

मुनरोलाई सन् २०१३ मा साहित्यतर्फको नोबेल साहित्य पुरस्कार दिइएको थियो । नोबेल कमिटीले मुनरोलाई ुसमकालीन कथाकी कुशल कालिगढ को संज्ञासमेत दिएको थियो । चर्चित क्यानडेली साहित्यकार मार्गरेट एटवुडलेले मुनरोलाई समकालीन अंग्रेजी कथामा प्रमुख लेखकमध्येकी एक भनेकी थिइन् ।

मुनरोको जन्म सन् १९३१ मा ओन्टारियोको किसान परिवारमा भएको थियो । उनी सानैदेखि साहित्यप्रति रूचि राख्थिन् । एकपल्ट उनले गार्डियनसँग भनेकी थिइन्, पुस्तक मेरा लागि जादुजस्तै थिए । र, म त्यो जादुको हिस्सा बन्न चाहन्थेँ ।

मुनरोको निधनमा क्यानडाका प्रधानमन्त्री जस्टिन ट्रुडोले दुस्ख व्यक्त गरेका छन् । प्रधानमन्त्रीले शोक वक्तव्य जारी गर्दै एक साहित्यिक हस्ती गुमाएको जनाएका छन् । प्रधानमन्त्री ट्रुडोले भनेका छन्, एलिस मुनरो विश्वकै महान कथाकारमध्येकी एक हुन् ।

उनी ९२ वर्षकी थिइन् । केही वर्षदेखि उनी डिमेन्सियाबाट ग्रसित थिइन् । जीवन, मित्रता र मानवीय सम्बन्धका बारेमा उनका कथाहरू पाठकमा अमिट छाप छाडेका छन् । एलिस मुनरोका डियर लाइफ,रनअवे,लाइभ्स अफ गर्ल्स एन्ड वुमेन लगायतका चर्चित पुस्तक छन् ।