अख्तियारको नाम बेच्ने रौतहटका यी नटबरलाल

गौर । एकजना बहुरुपी ठेकेदारका कारण रौतहट जिल्लाको सरकारी कार्यालयका कर्मचारीहरू दिग्भ्रमित हुने गरेका छन् । आफ्नो अख्तियार दुरुपयोग अनुसन्धान आयोगका पदाधिकारीसँग नजिकको सम्बन्ध रहेको भन्दै जिल्लाका सरकारी कर्मचारीहरूलाई थर्काएर ठेक्का फुत्काउने पूर्व वनपाले उनी हुँदै नभएको पावरको भ्रम छर्नमा माहिर छन् ।

कुनै समय सामान्य ठेकेदारको परिचय बनाएका गौर नगरपालिका वडा नं ५ निवासी यी यादवले नियम मिचेर ठेक्का नदिएको रिसमा जिल्ला विकास समितिका तत्कालीन प्रमुख वसन्त भण्डारीको क्वार्टरको भान्छाको टेबलमा पैसा राखेर अख्तियार लगाइ छापा मार्न लगाएका थिए । बसन्त भण्डारीलाई पक्राउ गर्न लगाएसँगै उनको नाम सुन्नेबित्तिकै रौतहटका सरकारी कार्यालयहरू थर्कमान हुने गरेका छन् ।

दाजुभाइसँग सम्पतिकाे निहुँमा झगडा गरिरहने यिनी बेलाबेलामा मात्र गौर आउँछन् । कुनैबेला नेकपा माओवादी निकट उनी प्रभु साहको घनिष्ठ थिए । प्रभुले पनि पछिल्लो समय पत्याउन छाडेपछि माधव नेपाल नजिक भए । माधव नेपालको नजिक भएपछि जापान सरकारको सहयोगमा गौरमा बन्दै गरेको कलाकुञ्ज पुस्तकालयको भवन अलपत्र छाडिदिए । करिब ५ करोडको लागतमा बन्ने भन्दै तत्कालीन जापानीज राजदूत र माधव नेपालले संयुक्त रुपमा शिलान्यास गरेको सो पुस्तकालय र गौरको चारतले भवन निर्माणका लागि यादवले श्रीमती रिना रायलाई उपभोक्ता समितिको अध्यक्ष बनाएका थिए । गौर नगरपालिकाको मेयर शम्भु शाहले खासै वास्ता नगरेपछि सो भवन अलपत्र छाडेर काठमाडौँतिर बस्न थालेको र नगरपालिकाले आफ्नै लगानीमा बाँकी काम गराउँदै गरेको स्थानीय बासिन्दाले जानकारी दिएका छन् ।

ठेक्का पट्टाको काम आफूले भनेअनुसार नभए अख्तियार ल्याएर दुःख दिने गरेका यादवले केही समय गौरमा हेल्पलाइन नेपाल नामक गैरसरकारी संस्थामार्फत समेत बजेट ल्याएर घोटला गरेका थिए । नेकपा माओवादी, प्रभु साह, माधव नेपाल हुँदै यादव यतिबेला केपी ओली सत्तामा फर्कनासाथ नेकपा एमालेका नेताहरुको दैलो धाउन थालेको स्थानीयको भनाइ छ ।

भारतको बिहार राज्यमा पछिल्लो ससुराली भएका यादवले आफ्नै जेठी श्रीमतीको हत्या गरेको हुनसक्ने नजिकका आफन्तहरूको भनाइ छ । उनले श्रीमतीको काकाको छोरीसँग प्रेम गरेकाे र श्रीमतीलाई भने  बिहारमा लगेर पाठेघर फालेका उनी निकटले सञ्चारमाध्यमलाइ जानकारी दिएका छन् ।  त्यसपछि ‘अब तँ बाट बच्चा हुँदैन, तेरै बहिनी बिहे गर्छु ‘ भन्दै फकाइ-फुल्याइ गरेर सालीसँग विवाह गरेका थिए । सालीसँग विवाह भएको केही वर्षपछि जेठी श्रीमतीलाई उपचारको नाममा बिहार लगे । तर  छरछिमेकीले त्यसको एक वर्षपछि मात्र  श्रीमतीकाे उतै सद्गगत गरेको थाहा पाएको पूर्वमेयर अजय गुप्ताका पिएले जानकारी दिएका छन् । अहिले उनी गौर आएको बेला भारतीय दूतावासबाट कसलाई के सहयोग चाहियो भन्दै भ्रम छर्ने गरेको अवस्था छ ।

Comments