कांग्रेसले माग्यो उपसभामुखको राजीनामा

काठमाडौं । नेपाली कांग्रेसले उपसभामुख इन्दिरा रानामगरको राजीनामा मागेको छ ।

कांग्रेस पदाधिकारी र पूर्व पदाधिकारीहरुको बुधबार बैठकले असम्वन्धित मानिसहरुको भिसाका लागि अमेरिकी दूतावासमा चिठ्ठी लेखेर उपसभामुखले अनुचित काम गरेको ठहर गर्दै उपसभामुखलाई राजिनामा मागेको हो ।

कांग्रेस प्रमुख सचेतक श्याम घिमिरेले भने, ‘हाम्रो चाहना के हो भने सबै प्रक्रियामा जानुभन्दा उहाँले बहिर्गमनको बाटो रोज्नु राम्रो हुन्छ ।’

त्यस्तै नेपाली कांग्रेसले उपसभामुख इन्दिरा रानामगर मुछिएको भिसा अन्तर्वार्ता सिफारिस विषयलाई संसदमा उठाइसकेको छ ।

कांग्रेस संसद रामहरी खतिवडाले उपसभामुखले मानवतस्करी गर्ने नियतले सिफारिस गरिएको पत्र सार्वजनिक भएको भन्दै यस्तो अवस्थामा उपसभामुखले संसदको नेतृत्व गर्न मिल्छ कि मिल्दैन भने प्रश्न उठेको बताएका थिए।

उनले उपसभामुख रानामगरलाई राजीनामा दिएर छानबिनमा सहयोग गर्न आग्रह गर्दै यो विषयको अनुसन्धान हुनुपर्ने माग समेत गरेका छन्।

खतिवडाले संसद र सभामुखलाई भिसाको कन्सल्टेन्सी बनाउन नमिल्ने बताउदै उपसभामुखले राजीनामा दिनु नै उपयुक्त हुने उनको भनाई रहेको थियो ।

त्यस्तै वर्तमान सरकारको नेतृत्व गरिरहको नेकपा एमाले सांसद तथा पुर्वसञ्चारमन्त्री गोकुल प्रसाद वास्कोटाले पनि प्रतिनिधिसभाको बैठकमा बोल्दै उपसभामुखको राजिनामा मागि सकेका छन् । वास्कोटाले आफूमाथि प्रश्न उठ्दा राजिनामा दिएको र अनुसन्धानमा सहयोग गरेको बताउँदै उपसभामुखले पनि नैतिकता देखाएर राजिनामा दिनुपर्ने बताएका थिए ।

Comments