सार्वजनिक गाडीको टिकटमा कालोबजारी गर्ने र नक्कली टिकट बेच्ने १४ जना पक्राउ

breaking news

काठमाण्डौ । दशैँको मौकामा सार्वजनिक गाडीको टिकटमा कालोबजारी गर्ने र नक्कली टिकट बेच्ने १४ जना पक्राउ परेका छन् ।

काठमाण्डौको नयाँ बसपार्क, बल्खु, कलङ्की, कोटेश्वरलगायतका ठाउँबाट आज १४ जना पक्राउ परेका काठमाण्डौ उपत्यका ट्राफिक प्रहरी कार्यालयका प्रहरी नायब उपरीक्षक रविन कार्कीले जानकारी दिनुभएको छ । पक्राउ परेकामध्ये केहीले तोकिएको भन्दा धेरै भाडा लिएका, केहीले नक्कली टिकट बेचेका रहेका उहाँको भनाइ छ ।

दशैँको समय र खराब सडकलाई कारण देखाएर दोब्बरसम्म भाडा भइरहेको पाइएको पनि ट्राफिक प्रहरीले जनाएको । दशैँको बेला टिकटमा कालोबजारी भएमा नजिकैको प्रहरी वा १०३ नम्बरमा ट्राफिक प्रहरीलाई खबर गर्न प्रहरी नायब निरीक्षक रविन कार्कीले आग्रह गर्नुभएको छ ।

यसैबीच यातायात व्यवसायीहरूले सर्वसाधारणलाई टिकट छैन भन्दै फर्काएर चर्को मूल्यमा गाडी रिजर्भमा चलाइरहेको गुनासो बढेको छ । टिकट काट्दा सरकारले तोकेकै भाउमा काट्नुपर्ने बाध्यताबाट उम्किनका लागि व्यवसायीहरूले यात्रुलाई चर्को मूल्यमा गाडी रिजर्भ गर्न बाध्य बनाएको पाइएको छ ।

काठमाण्डौमा नयाँ बसपार्कबाट अहिले देशका धेरै ठाउँमा जाने टिकट पाइँदैन । तर व्यवसायी र बिचौलियाले ‘रिजर्भमा जाने हो’ भन्दै यात्रुलाई सोधिरहेको देखिन्छ । कतिपय सर्वसाधारणले दोब्बर महँगो भाडा तिर्दा पनि टिकट नपाएको तर तीन गुणा धेरै भाडा लाग्ने गरी रिजर्भ गर्दा भने गाडी उपलब्ध भएको बताएका छन् ।