पाकिस्तानको जेलमा रहेका इमरान खान नोबेल शान्ति पुरस्कारका लागि मनोनीत

राजनीति

काठमाडौं । पाकिस्तानको जेलमा रहेका पूर्व प्रधानमन्त्री इमरान खानलाई नोबेल शान्ति पुरस्कारको लागि मनोनयन गरिएको छ। राष्ट्रिय कोष हिनामिना गरेको आरोपमा इमरान खान २०२३ देखि जेलमा छन्।

नर्वेको राजनीतिक दल पार्टीट सेन्ट्रमसँग सम्बन्धित पाकिस्तान वर्ल्ड एलायन्सले पाकिस्तानमा मानव अधिकार र लोकतन्त्रको प्रवर्द्धन गर्न इमरान खानको मनोनयनको घोषणा गरेको छ।

पार्टीट सेन्ट्रमले आइतबार एक्समा पोस्ट गर्‍यो,‘पार्टीट सेन्ट्रमको तर्फबाट हामी यो घोषणा गर्न पाउँदा खुसी छौं कि हामीले मनोनयन गर्ने अधिकार भएका जो कोहीसँग मिलेर, पाकिस्तानका पूर्व प्रधानमन्त्री इमरान खानलाई नोबेल शान्ति पुरस्कारको लागि मनोनीत गरेका छौं।’

यसअघि इमरानलाई २०१९ को नोबेल शान्ति पुरस्कारको लागि मनोनीत गरिएको थियो। यो मनोनयन भारतसँगको तनाव कम गर्न २०१९ मा गरिएको थियो। उनको समर्थनमा पाकिस्तान संसदमा एक प्रस्ताव पेस गरिएको थियो, जसमा भनिएको थियो, ‘इमरान खानले बालाकोट हवाई आक्रमण पछि भारतसँगको तनाव कम गर्ने प्रयास गरेका थिए।’

२०२५ को नोबेल शान्ति पुरस्कारका लागि ३३८ मनोनयनहरू छन्। यीमध्ये २४४ व्यक्ति र ९४ संस्थाहरू छन्। गत वर्ष यस पुरस्कारका लागि २८६ जना मनोनीत भएका थिए। २०१६ मा सबैभन्दा धेरै ३७६ मनोनयनहरू आएका थिए। २०२५ को नोबेल शान्ति पुरस्कारको लागि मनोनयनको अन्तिम मिति जनवरी ३१ थियो।