राप्रपाले आह्वान गरेको प्रदर्शन बल्खुमा हुने

समाचार

काठमाडौं । भोली चैत २६ गतेका लागि राष्ट्रिय प्रजातन्त्र पार्टी (राप्रपा)ले आह्वान गरेको प्रदर्शन बल्खुमा हुने भएको छ। जिल्ला प्रशासन कार्यालय काठमाडौंले बल्खु वा सिफलमा गर्न भनेकामा सोही अनुसार राप्रपाले बल्खुमा प्रदर्शन गर्ने निर्णय गरेको राप्रपा स्रोतले नानाएको छ ।

स्रोतका अनुसार, प्रशासनले सुरक्षाको कारण देखाउँदै भृकुटीमण्डपमा अनुमति नदिएपछि स्थान परिवर्तन गर्नुपरेको हो ।

यसअघि चैत २२ गते अपराह्न राप्रपाले भृकुटीमण्डपमा प्रदर्शन गर्न लागेको भन्दै जिल्ला प्रशासन कार्यालयलाई इमेलमार्फत जानकारी गराएको थियो। तर जिल्ला सुरक्षा समितिको बैठकले भृकुटीमण्डपको सट्टा बल्खु वा सिफल चौरमा सभा गर्न अनुमति दिने निर्णय गरेको थियो। सो निर्णयको जानकारी जिल्ला प्रशासन कार्यालयले पत्रमार्फत् राप्रपालाई दिएको थियो।

राष्ट्रिय प्रजातन्त्र पार्टीले चैत २६ गते गर्न लागेको उक्त प्रदर्शनलाई संयुक्त जनआन्दोलन समितिले समर्थन जनाएको छ।