पार्टी फुटाएर जानेहरू अघाएर झरेका किर्ना हुन् : प्रधानमन्त्री ओली

breaking news

चितवन । नेकपा एमालेका अध्यक्ष एवं प्रधानमन्त्री केपी शर्मा ओलीले दुई तिहाइको कम्युनिष्ट पार्टी दुईपटकसम्म फुटाएर जानेहरू पार्टी भित्र अघाएर झरेका ‘किर्ना’हरू भएको टिप्पणी गरेका छन् । नेकपा एमाले गैंडाकोट नगरकमिटीले आज नवलपुरमा आयोजना गरेको कार्यकर्ता भेटघाट कार्यक्रममा बोल्दै एमाले अध्यक्ष ओलीले पार्टीभित्र सधैं पाइरहेका र अवसर लिइरहेकाहरू नै असन्तुष्ट बन्ने टिप्पणी गरे ।

‘पाउनेले नै पार्टीभित्र असन्तुष्टि जनाएको पाउँछु, केही अगाडि पार्टीभित्र यस्तै अघाएका मान्छेहरू नै पार्टी फुटाएर गए,’ अध्यक्ष ओलीले भने, ‘मैंले तिनलाई अघाएका किर्नाहरू भन्ने गरेको छु, जो अघाएपछि झरे ।’ उनले गत संसदीय निर्वाचनमा एमालेका विरोधी राष्ट्रिय अन्तर्राष्ट्रिय शक्तिहरू एक ठाउँमा उभिएर पार्टी सक्काउन खोजेको तर अब परिस्थिति त्यस्तो नहुने बताए ।

‘हामी माथि अघिल्लो चुनावमा चौतर्फी हमला भयो, सिध्याउँछौ भनेर लागे, २/२ पटक पार्टी फुटाएर गए । तर हामी सकिएनौं, जनताले हाम्रो पार्टी सकिन दिएनन्, कार्यकर्ताले बचाए, हामीले ७९/८० सिट आयो,’ एमाले अध्यक्ष ओलीले कार्यकर्तालाई भने ‘अब त हारिन्छ होला भन्ने मानसिकता नलिनु उच्च मनोबलका साथ लाग्नु, विकास र समृद्धिको नेतृत्व मैंले गरेको छु ।’

एमालेलाई निर्णायक राष्ट्रिय शक्ति बनाउन पार्टीले चलाएका जरा अभियानलाई प्रभावकारी बनाएर जनताको घरघरमा जान ओलीले आग्रह गरे । उनले पार्टीका विरोधी शक्ति पर्याप्त भएकोले पार्टीभित्र नै एकले अर्कोलाई विरोध गर्न जरुरी नहुने बताए ।