वायु सेवा निगमको बैंकक स्टेशन ‘बेस्ट पर्फमेन्स अफ द इयर’, दामोदर मिश्र ‘बेस्ट प्रेजेन्टर’

काठमाडौं । नेपाल वायु सेवा निगमको दुई दिने बैठक विभिन्न १३ वटा निर्णय गर्दै सम्पन्न भएको छ । काठमाडौंमा यही जेठ १ गते (बिहीबार) र २ गते (शुक्रबार) आयोजित बैठक निगमका अन्तर्राष्ट्रिय स्टेशनहरुको आर्थिक वर्ष २०८१/८२ को बजेट समीक्षा गर्नुका साथै २०८२/०८३ को ट्राफिक र राजस्व पूर्वानुमानसम्बन्धी समीक्षा गर्दै सम्पन्न भएको हो । बैठकमा वायु सेवा निगमको अन्तर्राष्ट्रिय स्टेशन र कार्यरत प्रमुखहरूको कार्यसम्पादन मूल्याङ्कन गर्दै उत्कृष्ट काम गर्नेहरुलाई सम्मान पनि गरियो ।

संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले उद्घाटन गर्नु भएको बैठकमा निगमका सम्पूर्ण अन्तर्राष्ट्रिय स्टेशनहरुमा देखिएका कमीकमजोरीहरुको विश्लेषण गर्नुका साथै समस्या र समाधानहरुको पहिचान गरियो । यसैगरी आगामी दिनमा अवलम्बन गर्नुपर्ने सुधारका उपायहरुका विषयमा पनि छलफल भएको छ । यस्तै केन्द्रीय कार्यालय, सरोकार विभाग र सम्बन्धित स्टेशनहरु बिचको अन्तर- सम्बन्ध, प्रभावकारी समन्वय गर्ने जस्ता विषयहरुमा छलफल भएको वायु सेवा निगमका प्रवक्ता सुवास डाँगीद्वारा हस्ताक्षरित प्रेस विज्ञप्तिमा उल्लेख छ ।

कार्यक्रमका अवसरमा कार्य सम्पादन स्तरको आधारमा नेपाल वायु सेवा निगम  बैंकक (थाइल्याण्ड) स्टेशन ‘बेस्ट पर्फमेन्स अफ द इयर’ घोषित भएको छ । यसैगरी सोही स्टेशनका कन्ट्री मेनेजर दामोदर मिश्र ‘बेस्ट प्रेजेन्टर’ का रुपमा सम्मानित हुनुभयो । सम्मान ग्रहणपछि न्यूज नेपाल डटकमलाई प्रतिक्रिया दिँदै मिश्रले आफू र स्टेशनलाई प्रदान गरेको पुरस्कार तथा सम्मानले अझ राम्रो काम गर्न अभिप्रेरित गरेको जनाउनु भयो । मिश्रले भन्नुभयो, ‘यो पुरस्कार व्यक्तिगतभन्दा पनि हाम्रो टिमको कडा मेहनत र समर्पणको परिणाम हो। हामी यात्रुहरुको सन्तुष्टिलाई प्राथमिकतामा राखेर अझ प्रभावकारी सेवा प्रदान गर्न निरन्तर क्रियाशील रहनेछौं ।’

नेपाल–थाइल्याण्ड हवाई मार्गमा नेपाल वायुसेवाले महत्वपूर्ण उपस्थिति जनाउँदै आएको छ । थाइल्याण्डस्थित नेपाली समुदायले पनि कन्ट्री मेनेजर मिश्रको यो सफलतालाई गौरवको विषयका रूपमा लिएको प्रतिक्रिया दिएका छन्  ।

कार्यक्रमका अवसरमा दोहा स्टेशन प्रमुख र मुम्बइ स्टेशनका प्रमुख गणेश घिमिरे क्रमशः दोस्रो र तेस्रो बेस्ट प्रिजेन्टरका रुपमा सम्मानित हुनु भएको थियो । कार्यालय व्यवस्थापनतर्फ भैरहवा स्टेशन उत्कृष्ट भई स्टेशन प्रमुख दिवस खड्का सम्मानित हुनु भएको थियो । बैठकले सम्पूर्ण स्टेशनहरुको कार्यसम्पादन स्तरको मूल्यांकन गरेको र आगामी कार्यनिती तर्जुमा, उडान संख्या तथा यात्रु सेवा सुविधामा वृद्धिलगायतका विषयहरुमा महत्वपूर्ण निर्णय गरेको विज्ञप्तिमा उल्लेख छ ।

कार्यक्रम समापनका अवसरमा निगमका कार्यकारी अध्यक्ष युवराज अधिकारीले सक्रिय सहभागिताका लागि सम्पूर्ण कर्मचारीलाई धन्यवाद दिनु भएको थियो । उहाँले हरेक कर्मचारीको कार्यसम्पादनको आधारमा पुरस्कार र सजाय गरिने जनाउनु भयो । यसैगरी आ–आफ्नो क्षेत्रमा जिम्मेवार भई सबै स्टेशनहरुमा उडान तालिका अनुसार अन-टाइम पर्फमेन्स मेनटेन गर्ने, सम्भव भएसम्म खर्च कटौतीका उपायहरु अवलम्बन गर्ने, प्यासेन्जर ओकुपेन्सीका साथै रेभेन्यु वृद्धि समेतलाई ध्यानमा राख्दै राष्ट्र र निगमको हितमा समर्पित भई उत्कृष्ट कार्यसम्पादन गर्नका लागि निर्देशन दिनुभयो ।

निगमका कार्यकारी निर्देशक युवराज अधिकारीले अध्यक्षता गर्नु भएको कार्यक्रममा निगमका नायव महाप्रबन्धक जनकराज कालाखेती, डोलेश्वर कोइरालालगायत सबै विभागीय प्रमुखहरु, सम्बन्धित महाशाखा प्रमुखहरु र अन्तर्राष्ट्रिय क्षेत्रतर्फ विभिन्न आठ मुलुकबाट दश गन्तब्यका स्टेशन प्रमुखहरुको साथै काठमाडौं तथा भैरहवा स्टेशन प्रमुखहरुको सक्रिय सहभागिता रहेको थियो ।

Comments