युवा सङ्घको महाधिवेशन: फर्जी प्रतिनिधि भेटिएकोमा पुरि पक्षको अपत्ति

राजनीति

- न्यूज नेपाल

काठमाडौं । पोखरामा जारि राष्ट्रिय युवा सङ्घ नेपालको १० औँ महाधिवेशनबाट नयाँ नेतृत्व छनोट गर्न भइरहेको मतदानमा फर्जी प्रतिनिधि कार्डको प्रयोग भएपछि केहीबेर अवरुद्ध भएको मतदान प्रक्रिया पुन सुरु भएको छ ।

पर्यटकीय राजधानी पोखराको सभागृहमा सोमबार बिहान १० बजेबाट सुरु भएको मतदानका क्रममा रौतहटका प्रतिनिधि शेख जैद आलमको नाममा बनाइएको कार्डमा अर्कै व्यक्तिको फोटो टाँसिएको फेला परेको थियो । उक्त कार्ड प्रयोग गरी भोट हाल्न खोजिएपछि अन्य प्रतिनिधिहरूले अवरोध गरेका थिए ।

उक्त कार्यको अध्यक्षका उम्मेदवार सुमन पुरिले विरोध समेत जनाएका छन् । सामाजिक सञ्जाल फेसबुकमा लेख्दै उनले लेखेका छन्,

”स्वस्थ प्रतिस्पर्धा यही हो त?एक जना मान्छे उपस्थित छैन, उसको नाममा कार्ड बनाइन्छ। कार्डमा फोटो टाँसिन्छ।त्यही कार्ड लिएर अर्का मान्छे मतदान गर्न आउँछ, फर्काइन्छ।पछि “प्रतिनिधि व्यवस्थापन” ले फेरि अर्को कार्ड बनाएर पठाउँछ।यो के हो?

हारको डरले ?

यति गम्भीर बेइमानी,

अनि पनि जित्नुपर्छ भन्ने लोभ ?”

निर्वाचन समितिले तत्काल मतदान प्रक्रिया स्थगित गर्दै छानबिन अघि बढाएको थियो । अहिले डिजिटल कार्ड भएका प्रतिनिधिहरूले मात्र मतदान गर्न पाउने निर्णय भएपछि मतदान अघि बढेको छ ।

बिहान १० बजेबाट सुरु भएको मतदानमा दिउँसो १२ बजेसम्म ६०३ जनाले मतदान गरिसकेको निर्वाचन आयोगले जनाएको छ । महाधिवेशनमा कूल १ हजार ७ सय ६४ प्रतिनिधिहरूले मतदान गर्नेछन् ।

Comments

प्रकाशित मिति : 2025-05-27

युवा सङ्घको महाधिवेशन: फर्जी प्रतिनिधि भेटिएकोमा पुरि पक्षको अपत्ति

Comments

अरु समाचार