देशभरिका उपप्रमुख–उपाध्यक्षको भेला विराटनगरमा, पूर्वराष्ट्रपति भण्डारी प्रमुख अतिथि

विराटनगर । यही जेठ २३ र २४ गते विराटनगरमा देशभरिका स्थानीय तहका उपप्रमुख र कोशी प्रदेशका सम्पूर्ण पालिकाका उपाध्यक्षको राष्ट्रिय सम्मेलन हुने भएको छ । देशभरिका महानगर, उपमहानगर र नगरपालिकाका उपप्रमुख तथा कोशी प्रदेशका सम्पूर्ण पालिकाका उपाध्यक्ष सहभागी हुने सम्मेलनको उद्घाटन् पूर्वराष्ट्रपति विद्यादेवी भण्डारीले गर्ने कार्यक्रम छ ।

चीनबाट फर्किएलगत्तै पूर्वराष्ट्रपति विद्यादेवी भण्डारी उपप्रमुख–उपाध्यक्षको राष्ट्रिय सम्मेलनमा सहभागी हुन विराटनगर जाँदैछिन् । उनी कार्यक्रमको अघिल्लो दिन २२ गते बिहीबार नै विराटनगर पुग्ने बुझिएको छ ।

विराटनगर महानगरपालिकाको आयोजनामा हुने सम्मेलनमा देशभरिका उपप्रमुख तथा उपाध्यक्षहरुको काम, कर्तव्य र जिम्मेवारीका बारेमा छलफल हुनेछ । यस्तै कानुनले दिएको अधिकार र कार्यान्वयनमा चुनौतीलगायतको वियषमा पनि घनिभूत छलफल हुनेछ ।

कतिपय पालिकाका उपप्रमुख र उपाध्यक्षहरु अझै पनि आफ्नो काम, कर्तव्य र जिम्मेवारीका सम्बन्धमा प्रष्ट नभएकाले त्यस सम्बन्धमा छलफल गर्दै प्रष्ट पार्न सम्मेलन आयोजना गरिएको विराटनगर महानगरपालिकाकी उपप्रमुख शिल्पा कार्कीले न्यूज नेपाललाई जानकारी दिइन् । कार्कीले थप प्रष्ट पार्दै भनिन्, ‘उपप्रमुख र उपाध्यक्षलाई दिइएको जिम्मेवारी कानुनबमोजिम कार्यान्वयन गर्न अप्ठ्याराहरु हुन्छन्, त्यस्ता विषयबस्तुमा हामी छलफल गर्नेछौं ।’

कानुनमा नितीगत सुधार गर्नुपर्ने र संशोधन गर्नुपर्ने कु्राहरु के छन् ती सबै विषय समेटेर एउटा घोषणपत्र तयार गरिने पनि उपप्रमुख कार्कीले जानकारी दिइन् । सम्मेलनमा घनिभूत छलफल गरेर तयार पारिएको घोषणापत्र केन्द्रीय सदनसमक्ष पेश गरिने भएको छ ।

पूर्वराष्ट्रपति भण्डारीको बढ्दो राजनीतिक सक्रियता

चीनबाट फर्किएलगत्तै पूर्वराष्ट्रपति विद्यादेवी भण्डारी उपप्रमुख–उपाध्यक्षको राष्ट्रिय सम्मेलनमा सहभागी हुन विराटनगर जाँदैछिन् । पछिल्लो समय क्रमशः राजनीतिक सक्रियता बढाउँदै गएकी पूर्वराष्ट्रपति भण्डारीले यसअघि चार प्रदेशमा आयोजना भएका एमालेका विभिन्न कार्यक्रममा सहभागिता जनाएकी छन् ।

दुई महिनाको बीचमा भण्डारी सातवटामध्ये चारवटा प्रदेशमा राजनीतिक भेटघाटमा सहभागी भइन् । लुम्बिनी, बागमती, गण्डकी र कोशीका विभिन्न ठाउँमा सहभागी हुँदा पूर्वराष्ट्रपति भण्डारीले एमाले सम्बद्ध नेता–कार्यकर्ताहरुसँग भेटघाट तथा परामर्श गरेकी थिइन् । बाँकी रहेका तीन प्रदेश कर्णली, सुदूरपश्चिम र मधेश प्रदेशमा पनि जाने योजना रहेको स्रोतले जनाएको छ ।

Comments