अनेरास्ववियुको मतदान भोली, कुन प्यानलबाट को–को छन् उम्मेदवार ?

काठमाडौं । नेकपा एमाले निकट विद्यार्थी संगठन अनेरास्ववीयुको २४ औँ महाधिवेशन त्रिभुवन विश्वविद्यालय कीर्तिपुरमा जारि छ । जसमा नेतृत्व चयनका लागि आज हुने भनिएको मतदान भोली मात्रै हुने भएको छ ।

निर्वाचन मण्डलले आज बुधबार रातिका लागि तय गरेको मतदान प्राविधिक व्यवस्थापनका कारण बिहीबार बिहान मात्रै हुने अनेरास्ववियुका एक नेताले जानकारी दिए ।

यसअघि निर्वाचन समितिले बुधबार राति ८ बजेदेखि २ बजेसम्म मतदातको समय तोकेकोमा प्राविधिक व्यवस्थापनका कारण बिहीबार बिहानका लागि सारिएको जनाएको हो ।

सुरक्षाकर्मीले राति मतदान गर्दा समस्या हुने भन्दै भोलिका लागि बिहान ८ बजेदेखि मतदान गर्ने तयारी भएको उनको भनाई छ ।

को–कोबिच हुँदैछ प्रतिस्पर्धा ?

अनेरास्ववियुको नेतृत्वका लागि दुई प्यानलबीच प्रतिस्पर्धा हुने निश्चित भएको छ । दुवै पक्षबिच सहमति हुन नसकेपछि दुई पक्षिय प्रतिस्पर्धा हुने भएको हो ।जसमा अध्यक्षका लागि डा.सुजन कडरिया र प्रकाश पौडेलले उम्मेदवारी दिएका छन् । त्यस्तै उपाध्यक्षमा कडरिया प्यानलबाट अन्जना सिवाकोटी र पौडेल पक्षबाट विकास श्रेष्ठले उम्मेदवारी दिएका छन् ।

अन्य उपाध्यक्षहरुमा राजकुमार ढकाल, भरतसिंह धामी, धमेन्द्र केसी र गणेशबहादु शाही, महिला उपाध्यक्षमा सुजिता धिताल, भवानी बजगाईँ र आरती भट्टराई पनि उम्मेदवार भएका छन् ।

महासचिव पदमा दीपक धामी र आरके रोमशको उम्मेदवारी परेको छ । कडरिया पक्षबाट धामी र पौडेल पक्षबाट रोमशले उम्मेदवारी दिएका छन् । सुनिल कँडेल पनि महासचिवका उम्मेदवार छन् ।

उपमहासचिवको उम्मेदवारमा प्रेमिका शाही, कमल जोशी र अमरबहादुर शाही उम्मेदवार परेको छ। सचिवमा रेखा न्यौपाने, रक्षा बम, आकाश घर्तीमगर र रेखा थापा उम्मेदवार छन् ।

एमालेले अखिलमा ३२ वर्षे उमेर हद लगाएपछि सुरु भएको राष्ट्रिय सम्मेलनमा युवाहरुबीच प्रतिस्पर्धा हुन लागेको हो । अखिलको १५१ सदसीय केन्द्रीय समितिमा ९ पदाधिकारी हुनेछन् ।

Comments