एसीसी यू-१६ क्रिकेट : प्रशिद्धको शतकमा इन्डोनेशियालाई ४२१ रनको विशाल लक्ष्य प्रस्तुत

Breaking News

- NEWS NEPAL

काठमाडौं । नेपालले एसीसी मेन्स यू–१६ इस्ट जोन कप क्रिकेटमा आइतबार शानदार खेल प्रस्तुत गरेको छ । आज भएको नेपालको तेस्रो खेलमा नेपालले इन्डोनेशियालाई ४२१ रनको विशाल लक्ष्य प्रस्तुत गर्दै उत्कृष्ट सुरुवात गरेको हो ।

टस हार्दै ब्याटिङको निम्तो पाएको नेपालले निर्धारित ५० ओभरमा मात्र पाँच विकेट गुमाउँदै ४२० रनको स्कोर बनायो । नेपालका लागि ओपनर प्रशिद्ध जैसी र परिमार्जन यादवले १३० रनको ओपनिङ साझेदारी गरेका थिए ।

तस्तै, आजको खेलमा नेपाली टोलीका ओपनर ब्यट्सम्यान प्रशिद्ध जैशीले शतक प्रहार गरेका छन् । उनले ११४ बलको सामना गरेका उनले १५ चौका र एक छक्काको मद्धतमा १३२ रन बनाएका हुन् ।

यस्तै परिमार्जनले पहिलो विकेट गुमाउनुअघि २८ बलमा ८ छक्का र चार चौका प्रहार गर्दै ७१ रनको योगदान दिएका थिए । रौनक श्रीवास्तवले ७१ बलमा ८८ रन प्रहार गरे । उनले ८ चौका र दुई छक्का प्रहार गर्दै उक्त स्कोर बनाएका हुन् ।

यस्तै अर्का ब्यट्सम्यान जोय थापाले पनि अर्धशतक प्रहार गरेका छन् । उनले ४१ बलमा सात चौकाको सहयोगमा ५७ रन बनाएका हुन् । सुगम बुढाथोकीले नटआउट ३९ रन बनाउँदा रोशन शाहीले १० रन बनाए । शिवांश बजगाईं भने आज ६ बल खेल्दै चार रनमा आउट भएका थिए।

इन्डोनेशियाका लागि केतुत धर्मपुत्रले २ विकेट लिँदा रायन रिजा अथालिया, महेन्द्र अजी युद्ध प्रतमा र कविन निरज चड्डाले एकएक विकेट लिए । नेपालको समूह चरणमा यो तेस्रो खेल हो । यसअघिका दुई खेलमा नेपाल विजयी भएको थियो ।