नागार्जुनका मेयर बस्नेतलाई भ्रष्टाचारमा ८ वर्ष कैद सजाय

breaking news

- न्यूज नेपाल

काठमाडौं । बिशेष अदालतले सम्पत्ती शुद्धीकरणको मुद्दामा नागार्जुन नगरपालिकाका निलम्बित प्रमुख मोहनबहादुर बस्नेतलाई दोषी ठहर गर्दै ८ वर्ष तीन महिना कैद सजाय तोकेको छ ।

अख्तियार दुरुपयोग अनुसन्धान आयोगले बस्नेतले पद्मा कोलोनी र पद्मा मर्चेन्ट कम्पनी प्रालिका सञ्चालक तथा अध्यक्ष राजुप्रसाद कँडेलबाट ९ करोड २२ लाख ४६ हजार ३२ रुपैयाँ ३३ पैसा घुस लिएको भन्दै २०८१ पुस १४ गते मुद्दा दायर गरेको थियो ।

सोही मुद्धामा सोमबार बिशेष अदालतका न्यायाधीश टेकनारायण कुँवर र रामबहादुर थापाको इजलासले बस्नेतलाई दोषी ठहर गर्दै भ्रष्टाचार निवारण ऐन बमोजिमको कसुरमा ८ वर्ष ३ महिना कैद सजायको फैसला गरेको हो ।

अदालतले बस्नेतबाट २६ करोड २५ लाख रुपैयाँ सम्पत्ति जफतको फैसला समेत गरेको छ । यस्तै, बस्नेतलाई १ करोड ५ लाख रुपैयाँ र पद्मा कोलनीका सञ्चालक कँडेललाई ९ लाख २२ हजार रुपैयाँ पीडित राहत संकलन कोषमा भराउने फैसला समेत अदालतले गरेको छ ।

उक्त मुद्दामा बस्नेत सहित कँडेल पनि दोषी ठहर भएका थिए । अदालतले निलम्बित मेयर बस्नेतकी श्रीमती उर्मिलालाई भने सफाइ दिएको छ ।