एमाले पोलिटब्युरो बैठक दिउँसो १ बजेदेखि बस्दै, विधान प्रस्ताव अनुमोदन गरिने

राजनीति

काठमाडौं । नेकपा एमालेको पोलिटब्युरो बैठक दिउँसो १ बजे बोलाइएको छ । ललितपुरको च्यासलस्थित एमाले केन्द्रीय कार्यालयमा विहान ११ बजेका लागि बोलाइएको बैठक १ बजे सारिएको हो । बिहीबार राति सम्पन्न सचिवालयको ४९ औँ बैठक लम्बिएका कारण आजको बैठकको समय सारिएको बुझिएको छ ।

बिहीबारको बैठकले १५ पदाधिकारीसहित १५१ सदस्यीय केन्द्रीय कमिटीको प्रस्ताव पारित गरेको थियो । उपाध्यक्ष विष्णुप्रसाद पौडेलद्वारा प्रस्तुत विधान संशोधन प्रस्तावमा बिहीबार छलफल हुँदा ७० वर्षको उमेर हद र कार्यकारी पदमा २ कार्यकाल रहन पाउने व्यवस्था आगामी कार्यकालमा प्रभावित नहुने सहमति भएको थियो ।

पोलिटब्युरो बैठकमा पुनः ती विषयमा छलफल हुने प्रचार विभाग प्रमुख राजेन्द्र गौतमले बताए । पूर्वराष्ट्रपति विद्या भण्डारीलाई पार्टी कामको जिम्मेवारी दिने, नदिनेबारे बिहीबार नै विषय प्रवेश भएको भन्दै गौतमले पोलिटब्युरोमा पनि त्यसबारे चर्चा हुनसक्ने बताए ।

बिहीबारको सचिवालय बैठकका प्रायः वक्ताले पूर्वराष्ट्रपति भण्डारी पार्टी काममा फर्किनेबारे पार्टीलाई औपचारिक जानकारी नदिएको भन्दै जिम्मेवारी दिनेबारे अहिल्यै हतारमा निर्णय गर्न नहुने धारणा राखेको एक पदाधिकारीले बताए । ‘उहाँ आफैँले पार्टीसमक्ष आफ्ना माग, चाहना र उद्देश्य बताउनु हुन्छ भन्ने हाम्रो अपेक्षा छ, त्यसपछि पार्टी बैठकमा फेरि छलफल गर्न सकिन्छ’, उनले भने ।