ऐन महरअघि रश्लिला छुटेको खुलासा, अरनिको पाँडे प्रकरणको हल्ला रोचक !

काठमाडाैं । नेकपा एमालेका केन्द्रीय सदस्य ऐन महरलाई साइबर ब्यूरो हुँदै सरकारी वकिलको कार्यालय पुर्‍याइएपनि हाजिर जमानीमा एकैछिनमा छाडिएको र यस्तै प्रकृतिको राष्ट्रिय स्वतन्त्र पार्टीका केन्द्रीय सदस्य अरनिको पाँडेलाई थुनामा राखेको विषयमा राजनीतिक प्रतिशोधको हल्ला चलाइएको छ । तर, महर प्रकरणमै जोडिएकी रश्मिला धामी पनि हाजिर जमानीमा छुटेको पाइएको छ ।

एमाले नेता महर र उनकी पत्नी सनुजा श्रेष्ठलाई लिएर महर भोटाहिटीस्थित साइबर ब्युरोमा हाजिर भएका थिए । त्यसपछि प्रहरीले आवश्यक अनुसन्धान तथा जाँचबुझ पश्चात सरकारी वकिलको कार्यालयले हाजिर जमानीमा छाडेको थियो ।

महर र पाँडे प्रकरणमा मिडिया ट्रायल गर्न खोजिएको र समान प्रकृतिका मुद्दामा समान व्यवहार गरेको विषय पारदर्शी भएपनि यस्ता विषय उचाल्न खोज्दा न्याय निरुपणदेखि सरकारी कार्यसम्पादनमा समेत प्रभाव पर्नसक्ने एक अधिकारीले न्यूज नेपाललाई बताए ।

महर दम्पति र रश्मिला धामीबीच पहिलेदेखि नै सामाजिक सञ्जालमा आरोप-प्रत्यारोप चलिरहेको थियो । सोहि प्रकरणमा महरले पनि धामीविरुद्ध उजुरी दिएका थिए । यसैगरि धामीलाई पनि छाडिएको सरकारी वकिलको कार्यालयले जनाएको छ ।

जिल्ला सरकारी वकिल कार्यालय काठमाडौँका सहन्यायाधिवक्ता रामहरि काफ्लेले महर दम्पतीलाई छाड्ने निर्णय गरेका हुन् । तर, उनै काफ्लेले बिहीबार त्यस्तै प्रकृतिको कसुरमा संलग्न रास्वपा नेता अरनिको पाँडेलाई नछाडेपछि यो विषयमा अनेक चर्चा चलिरहेको छ ।

काफ्लेले पाँडेको मुद्दा शुक्रबार नै दर्ता गर्ने काम अघि बढेको र महर दम्पतिको हकमा रश्मिला धामीलाई जसरी नै व्यवहार गरिएको बताएका छन् । महरदम्पति भन्दा पहिले धामीले हाजिरी जमानीमा छुट्ने माैका पाइसकेकी थिइन् ।

Comments