संविधान दिवसः दलहरू आफ्नै कार्यालयमा कार्यक्रम गर्दै

३ असोज, काठमाडौं । जेनजी युवा आन्दोलनपछि आक्रामक नभई रक्षात्मक अवस्थामा पुगेका प्रमुख राजनीतिक दलहरूले यस वर्ष संविधान दिवस आफ्ना–आफ्नै पार्टी कार्यालयमै कार्यक्रम गरी मनाउने भएका छन् । आन्दोलनकै क्रममा पार्टी कार्यालयहरूमा आगजनी भएपछि दलहरूले त्यसै स्थानलाई संविधान रक्षाका खबरदारीसहित उत्सव स्थल बनाएका हुन् ।

जेनजी आन्दोलनपछि पूर्वप्रधानन्यायाधीश सुशीला कार्कीको नेतृत्वमा अन्तरिम सरकार गठन भए पनि लोकतान्त्रिक गणतन्त्र माथि चुनौती आउन सक्ने आकलन गर्दै दलहरूले संविधान दिवसलाई सचेतनासहित मनाउने तयारी गरेका छन् ।

नेपाली कांग्रेस

नेपाली कांग्रेसले ७७ वटै जिल्लामा ‘संविधान हातमा’ अभियानमार्फत शान्तिपूर्ण कार्यक्रम गर्ने भएको छ । उपसभापति पूर्णबहादुर खड्काले संयमित र दृढतापूर्वक संविधानको रक्षा गर्ने संकल्पसहित दिवस मनाइने बताए ।

नेकपा एमाले

एमालेले काठमाडौंको च्यासलस्थित केन्द्रीय कार्यालयमै बिहान ८ बजे कार्यक्रम गर्नेछ । सो कार्यक्रममा निवर्तमान प्रधानमन्त्री केपी शर्मा ओली सहभागी हुनेछन् । महासचिव शंकर पोखरेलले आन्दोलनका नाममा संवैधानिक व्यवस्थालाई कमजोर पार्ने षड्यन्त्र भइरहेको भन्दै संविधानको रक्षा गर्न कार्यक्रम आयोजना गरिएको जानकारी दिए । प्रचार विभाग प्रमुख राजेन्द्र गौतमका अनुसार, राजधानी बाहेक ७७ जिल्लामा समेत वृहत कार्यक्रम गरिनेछ ।

माओवादी केन्द्र

नेकपा माओवादी केन्द्रले पेरिसडाँडास्थित केन्द्रीय कार्यालय परिसरमै अध्यक्ष प्रचण्डको उपस्थितिमा दिवस मनाउने तयारी गरेको छ । पार्टी सचिव गणेशमान पुनका अनुसार, कार्यक्रममा शहीदहरूको सम्झनामा दीप प्रज्वलनसहितका गतिविधि हुनेछन् । वाईसीएल अध्यक्ष पुष्प ओलीले संविधान र व्यवस्थाको रक्षाका लागि खबरदारी गर्दै युवा आन्दोलनको मूल मर्मलाई सम्बोधन गर्ने बताए ।

राष्ट्रिय समारोह सामान्य तरिकाले

संविधान घोषणा भएको १० वर्ष पुगेको अवसरमा मूल समारोह समिति गठन भए पनि जेनजी आन्दोलनपछि ठूलो उत्सव नगरी सामान्य तरिकाले दिवस मनाइने भएको छ । टुँडिखेलस्थित सैनिक मञ्चमा बिहान साढे आठ बजे हुने कार्यक्रममा राष्ट्रपति रामचन्द्र पौडेल अध्यक्षता गर्ने र अन्तरिम प्रधानमन्त्री सुशीला कार्कीले सम्बोधन गर्ने तय भएको छ । तर, यस पटक सांस्कृतिक झाँकी र विशेष प्रदर्शन भने रहने छैनन् ।

त्यसैगरी राष्ट्रपति पौडेलले अपराह्न ३स्३० बजे शीतल निवासमा छुट्टै कार्यक्रम आयोजना गर्ने तयारी गरेका छन् ।

Comments