भारतको हिमाचलमा ग्यास सिलिण्डर विस्फोट, ९ जना नेपालीको मृत्यु

काठमाडौं । भारतको हिमाचल प्रदेशमा भएको ग्यास सिलिण्डर विस्फोटबाट ९ जना नेपालीको ज्यान गएको छ। सोलन जिल्लाको अर्की क्षेत्रमा ग्यास सिलिण्डर विस्फोटपछि भएको भीषण आगलागीमा परी उनीहरूको मृत्यु भएको हो।

मृतकहरू सबै सल्यान जिल्लाको सिद्ध कुमाख गाउँपालिका–२ का बासिन्दा रहेको पुष्टि भएको छ। गाउँपालिका अध्यक्ष भरत गिरी र वडाध्यक्ष मेघराज बुढाथोकीले विज्ञप्ति जारी गर्दै वडाका दुई परिवारका ९ जनाको मृत्यु भएको जानकारी दिएका छन्।

मृत्यु हुनेहरू स्थानीय धनबहादुर वि.क र काशीराम वि.कका परिवारका सदस्य हुन्। धनबहादुर वि.क (३३), उनकी श्रीमती कविता वि.क (३२), छोरी राधा वि.क (१६), रेणुका वि.क (१०) र राजन वि.कको घटनास्थलमै मृत्यु भएको हो। त्यस्तै, काशीराम वि.क (४७) का परिवारका उनकी श्रीमती टीका वि.क (३२), छोरी अनु वि.क (१२) र छोरा किरण वि.क (७) को पनि आगलागीमा ज्यान गएको छ।

वडाका दुई परिवारका ९ सदस्यको एकैपटक निधन भएपछि मंगलबार वडाभर शोक विदा दिइएको वडासचिव कृष्ण चलाउनेले जानकारी दिए। उनका अनुसार दुवै परिवार रोजगारीका लागि हिमाचल प्रदेशमा बस्दै आएका थिए। काशीराम वि.कका भाइले हिमाचलबाट गाउँमा घटनाबारे जानकारी गराएका थिए।

भारतीय सञ्चारमाध्यमहरूका अनुसार सोमबार बिहान करिब २ः३० बजे ग्यास सिलिण्डर विस्फोट भएपछि एउटा घरमा आगलागी भएको थियो। फेन्सी पसलसमेत रहेको उक्त घरमा लागेको आगो छेउछाउका घर तथा पसलहरूमा पनि फैलिएको थियो।

वेबइन्डियाका अनुसार आगलागीबाट १५ भन्दा बढी पसलमा क्षति पुगेको छ। समाचारमा आगलागीपछि ९ जना नेपाली घरभित्रै अड्किएका र निसास्सिएर मृत्यु भएको हुनसक्ने उल्लेख गरिएको छ।

Comments