आईसीसी टी–२० विश्वकपका लागि नेपाली टोलीको बिदाइ

काठमाडौं । आगामी फेब्रुअरी–मार्चमा भारत र श्रीलंकामा आयोजना हुने आईसीसी टी–२० विश्वकप क्रिकेटमा सहभागी हुन जाने नेपाली राष्ट्रिय क्रिकेट टोलीको बिदाइ गरिएको छ। नेपाल क्रिकेट संघ (क्यान) ले शनिबार एक कार्यक्रमको आयोजना गरी टोलीलाई औपचारिक रूपमा बिदाइ गरेको हो।

विश्वकपअघि श्रीलंका र भारतमा अभ्यास शृंखला खेल्ने कार्यक्रम रहेकाले टोलीलाई आज नै बिदाइ गरिएको क्यानले जनाएको छ। नेपाली टोली आइतबार त्यसतर्फ प्रस्थान गर्नेछ।

बिदाइ कार्यक्रममा बोल्दै क्यानका सचिव पारस खड्काले विश्वकपका लागि टोलीलाई शुभकामना व्यक्त गरे। ‘यो समग्र विश्वले हेर्ने प्रतियोगिता हो। हामी राम्रो गर्दै आएका छौं। खेलाडीदेखि व्यवस्थापन टिमसम्म सबैलाई शुभकामना छ,’ खड्काले भने, ‘भारतमा पनि नेपाली समर्थकले साथ दिनुहुनेछ भन्ने आशा छ।’

कप्तान रोहित पौडेलले टोलीको तयारी सन्तोषजनक रहेको बताए। ‘तयारी निकै राम्रो भइरहेको छ। अभ्यासबाट राम्रो बिल्डअप भएको महसुस भएको छ,’ उनले भने, ‘सन् २०२५ हाम्रो लागि उत्कृष्ट रह्यो। आशा छ, यो वर्ष पनि राम्रो हुनेछ र हामी सबै नेपालीलाई गर्व गराउनेछौं।’

टोलीका मुख्य प्रशिक्षक स्टुअर्ट लले पनि विश्वकपमा राम्रो प्रदर्शन गर्ने विश्वास व्यक्त गरे। ‘अभ्यासमार्फत योजनालाई अन्तिम रूप दिनेछौं। विश्वकपमा राम्रो प्रदर्शन गरेर सम्पूर्ण नेपालीलाई खुसी दिनेछौं,’ लले भने।

नेपाली टोलीले विश्वकपको समूह चरणमा इंग्ल्यान्ड, वेस्ट इन्डिज, बंगलादेश र इटलीसँग प्रतिस्पर्धा गर्ने तालिका रहेको छ। त्यसअघि टोलीले श्रीलंकामा श्रीलंका ‘ए’ टोलीसँग तथा भारतमा मुम्बईको एमसीए प्रेसिडेन्ट ११ सँग अभ्यास खेल खेल्नेछ।

आईसीसी टी–२० विश्वकपका लागि रोहित पौडेलको कप्तानीमा नेपाली राष्ट्रिय क्रिकेट टोलीको घोषणा यसअघि नै भइसकेको छ।

Comments

• टि-२० विश्वकप
• नेपाली क्रिकेट