विमानस्थल भन्सार कार्यालयका ३ कर्मचारी घुससहित पक्राउ

काठमाडौं । त्रिभुवन अन्तर्राष्ट्रिय विमानस्थलस्थित भन्सार कार्यालयका अधिकृत इन्द्र न्यौपानेसहित तीन जना कर्मचारी घुस रकमसहित पक्राउ परेका छन्। अख्तियार दुरुपयोग अनुसन्धान आयोगले सोमबार भन्सारको वैदेशिक हुलाक भन्सार शाखामा कार्यरत अधिकृत न्यौपाने, सञ्चार मन्त्रालयबाट खटिएका गोश्वारा हुलाक कार्यालय निकासी शाखाका नायब सुब्बा छविप्रसाद रिजाल र कार्यालय सहयोगी गणेशप्रसाद पुडासैनीलाई नियन्त्रणमा लिएको हो।

अख्तियारका अनुसार उनीहरूको साथबाट दुई लाख ६८ हजार २८८ रुपैयाँ नगद तथा २३ थान मोबाइल फोन बरामद गरिएको छ। बरामद रकम घुस तथा स्रोत नखुलेको अख्तियारका प्रवक्ता सुरेश न्यौपानेले जानकारी दिए। तीनै जना कर्मचारी र अन्य केही शंकास्पद व्यक्तिका नाममा रहेका मोबाइलसमेत नियन्त्रणमा लिइएको उनले बताए।

नेपालबाट कुरिअरमार्फत सामान पठाउने क्रममा सेवाग्राहीसँग घुस लिएको उजुरीपछि अख्तियारले टंगालबाट टोली खटाई अनुसन्धान थालेको थियो। अनुसन्धानका क्रममा कार्यालय सहयोगी पुडासैनीको कार्यकक्षबाट १० हजार रुपैयाँ घुस बरामद गरिएको छ भने उनको घरबाट स्रोत नखुलेको ४० हजार ३५० रुपैयाँ फेला परेको छ। साथै, उनको साथबाट थप ९६ हजार ७० रुपैयाँ बरामद भई कुल एक लाख ४६ हजार ४२० रुपैयाँ नियन्त्रणमा लिइएको अख्तियारले जनाएको छ।

त्यस्तै, नायब सुब्बा रिजालको साथबाट सेवाग्राहीबाट लिएको २० हजार रुपैयाँ घुस तथा स्रोत नखुलेको १८ हजार ८४८ रुपैयाँ गरी कुल ३८ हजार ८४८ रुपैयाँ बरामद गरिएको छ।

अख्तियारका अनुसार अधिकृत न्यौपाने, नासु रिजाल र सहयोगी पुडासैनीको मिलेमतोमा घुस रकम संकलन गरी बाँडफाँट गर्नुअघि नै उनीहरूलाई नियन्त्रणमा लिइएको हो। बरामद गरिएका २३ थान मोबाइललाई विधिविज्ञान प्रयोगशाला पठाउने तयारी भइरहेको अख्तियारले जनाएको छ।

Comments