शेखर कोइरालामाथि षडयन्त्र गर्न खोजियो, आरोप पूर्णतः कपोलकल्पित: स्वकीय सचिव थपलिया

विराटनगर । अनलाइन सञ्चारमाध्यममा प्रकाशित एउटा समाचारप्रति नेपाली कांग्रेसका नेता डा. शेखर कोइरालाका स्वकीय सचिव दिनेशचन्द्र थपलियाले गम्भीर आपत्ति जनाउँदै सबै आरोप पूर्णतः असत्य र भ्रामक भएको बताएका छन् ।

निर्वाचनमा होमिएका बेला डा. कोइरालामाथि षडयन्त्र गर्न खोजिएको आशय व्यक्त गर्दै उनले आरोप पूर्णतः कपोलकल्पित भएको बताए । थपलियाले जारी गरेको प्रेस वक्तव्यमा आफूलाई पार्टी सभापति गगनकुमार थापालाई निर्वाचनमा पराजित गराउने कथित षड्यन्त्रमा संलग्न रहेको भनी लगाइएको आरोप तथ्यहीन, अपुष्ट र कपोलकल्पित भएको स्पष्ट पारेका छन् ।

उनले भनेका छन्, ‘जिम्मेवार नेताको स्वकीय सचिवका रूपमा संगठनको मूल्य, मान्यता र अनुशासनविपरीत कुनै गतिविधिमा संलग्न हुनु त परको कुरा । त्यस्तो सोचसमेत राखिँदैन ।’ नेतृत्व, संगठन र पार्टीको प्रतिष्ठामा आँच आउने कुनै पनि कार्यमा आफ्नो संलग्नता नरहेको थपलियाले प्रष्ट पारेका छन् ।

वक्तव्यमा लेखिएको छ, ‘यस्ता आरोपले व्यक्तिगत प्रतिष्ठा मात्र नभई समग्र संगठन र लोकतान्त्रिक अभ्यासमाथि नै आघात पुर्याउँछ ।’ वक्तव्यमा समाचारमा उल्लेख गरिएका व्यक्तिहरूसँग कुनै प्रकारको भेटघाट वा संवाद नभएको पनि स्पष्ट पारिएको छ ।

तथाकथित अडियो सामग्रीसमेत भ्रामक भएको दाबी गर्दै उनले आवश्यक परे स्वतन्त्र फोरेन्सिक परीक्षण गराउन तयार रहेको जनाएका छन् । थपलियाले यस विषयलाई लिएर सम्बन्धित निकायसँग परामर्श भइरहेको जानकारी दिँदै व्यक्तिगत प्रतिष्ठा र सत्यको रक्षा गर्न कानुनी उपचारको विकल्पसमेत खुला राखिएको बताएका छन् ।

राजनीतिक रूपमा संवेदनशील समयमै यस्ता अपुष्ट समाचार सार्वजनिक हुनु दुःखद् भएको उल्लेख गर्दै उनले आम जनसमुदायलाई तथ्यमा आधारित सूचनामा मात्र विश्वास गर्न आग्रह गरेका छन् । शुक्रबार वक्तव्य जारी गर्दै उनले ‘सत्य सधैं स्पष्ट हुने’ उल्लेख गरेर भ्रमपूर्ण प्रचारबाट सचेत रहन पार्टी पंक्ति र शुभेच्छुकहरूलाई अपिल गरेका छन् ।

मोरङको निर्वाचन क्षेत्र नम्बर ६ का उम्मेदवारसमेत रहेका कांग्रेस नेता डा. शेखर कोइरालाले सर्लाहीको निर्वाचन क्षेत्र नम्बर ४ मा उम्मेदवार रहेका पार्टी सभापति गगनकुमार थापालाई हराउन र रास्वपा उम्मेदवार अमरेशकुमार सिंहलाई जिताउन कार्यकर्ता परिचालन गरेको अडियो बाहिरिएको भन्दै समाचार सार्वजनिक भएको थियो । समाचारमा शेखरका तर्फबाट उनका स्वकीय सचिव थपलियाले थापालाई चुनाव हराउने विषयसँग सम्बन्धित कुरा गरेको भनेर अडियो सार्वजनिक गरिएको छ । त्यही सन्दर्भमा प्रेस वक्तव्य जारी गरेर थपलियाले खण्डन गर्दै स्पष्टीकरण दिएका हुन् ।

Comments