पेट्रोल, डिजेल, मट्टीतेल तथा एलपी ग्यासको मूल्य हालका लागि यथावत, हवाइ इन्धनकाे मूल्य बढ्याे

अर्थ र बाणिज्य

काठमाडौं । मध्यपूर्व क्षेत्रमा जारी युद्धका कारण अन्तर्राष्ट्रिय बजारमा पेट्रोलियम पदार्थको मूल्य निरन्तर रूपमा उच्च दरले वृद्धि भइरहेका बेला नेपाल आयल निगमले पेट्रोल, डिजेल, मट्टीतेल तथा एलपी ग्यासको मूल्य हालका लागि यथावत राख्ने निर्णय गरेको छ ।

निगमका अनुसार चैत १७ गते इन्डियन आयल कर्पोरेसनबाट प्राप्त नयाँ खरिद मूल्यअनुसार पेट्रोलमा प्रति लिटर ४१ रुपैयाँ ६० पैसा, डिजेल तथा मट्टीतेलमा ९४ रुपैयाँ ९३ पैसा, एलपी ग्यासमा १९० रुपैयाँ ३६ पैसा तथा हवाइ इन्धनमा १२३ रुपैयाँ ८० पैसा वृद्धि भएको छ । निगमका अनुसार मूल्य यथावत राख्दा ठूलो घाटा व्यहोर्नुपर्ने अवस्था सिर्जना हुनेछ । त्यसैलाई मध्यनजर गर्दै हवाइ इन्धनमा भने ‘नो प्रफिट, नो लस’ (ब्रेक–इभन) स्थितिमा पुग्ने गरी मूल्य समायोजन गरिएको छ ।

अन्तर्राष्ट्रिय बजारमा भइरहेको मूल्यवृद्धिका कारण निगमको घाटा अप्रत्यासित रूपमा बढ्दै गएको र यसले वित्तीय अवस्था कमजोर बनाउनुका साथै आपूर्ति प्रणालीमै असर पर्ने जोखिम रहेको पनि निगमले उल्लेख गरेको छ । यसैबीच निगमले पेट्रोलियम पदार्थ र एलपी ग्यासको प्रयोगमा मितव्ययिता अपनाउन सम्पूर्ण उपभोक्तालाई आग्रहसमेत गरेको छ ।