हर्क साम्पाङले मागे प्रधानमन्त्री वालेन्द्र शाहको राजीनामा

काठमाडौं । श्रम संस्कृति पार्टीका संसदीय दलका नेता तथा प्रतिनिधिसभा सदस्य हर्क साम्पाङले प्रधानमन्त्री वालेन्द्र शाह संसदप्रति गैरजिम्मेवार बनेको आरोप लगाएका छन् । बिहीबार विज्ञप्ति जारी गर्दै उनले प्रधानमन्त्री संसदमा उपस्थित नभई नीति तथा कार्यक्रममाथिको छलफलबाट टाढा रहनु संसदीय परम्परा र लोकतान्त्रिक मूल्यविपरीत भएको बताएका हुन् ।

साम्पाङले राष्ट्रपतिबाट सरकारको नीति तथा कार्यक्रम प्रस्तुत गराएपछि प्रधानमन्त्री स्वयं संसदमा उपस्थित भएर उठेका प्रश्नको जवाफ दिनुपर्ने संसदीय अभ्यास रहेको उल्लेख गरेका छन् । तर प्रधानमन्त्री लगातार संसदमा अनुपस्थित रहनु, प्रतिपक्षले उपस्थितिको माग गर्दा समेत बेवास्ता गर्नु र संसदका गतिविधि कार्यालयबाट ‘लाइभ’ हेरेर बस्नुले संसदको गरिमामाथि आघात पुगेको उनको भनाइ छ ।

विज्ञप्तिमा उनले प्रधानमन्त्रीले संसदमार्फत सम्पूर्ण नेपाली जनताको लोकतन्त्रमाथिको विश्वास कमजोर बनाएको आरोप लगाएका छन् । \संसदको मर्यादा र गरिमा जोगाउन नसक्ने प्रधानमन्त्री असफल भएको देखिन्छ,’ विज्ञप्तिमा उल्लेख छ ।

साम्पाङले प्रधानमन्त्री संसदमा उपस्थित भएर जनताका प्रश्नको जवाफ दिन नसक्नु गम्भीर विषय भएको भन्दै नैतिकताको आधारमा पदबाट राजीनामा दिनुपर्ने मागसमेत गरेका छन् । उनले संसदलाई छलेर अध्यादेशमार्फत शासन सञ्चालन गर्ने प्रवृत्तिले लोकतान्त्रिक प्रणाली कमजोर बनाउने चेतावनी दिएका छन् ।

त्यस्तै, सरकार सीमासुरक्षा, जनजीविका र सुशासनका विषयमा समेत असफल भएको आरोप लगाउँदै साम्पाङले जनताको न्यूनतम अपेक्षा पूरा गर्न सरकार चुकेको टिप्पणी गरेका छन् ।

Comments