आईसीसी विश्वकप लिग–२ : नेपालकाे शानदार जित, अमेरिकालाई १२२ रनले हरायो

काठमाडौँ । आईसीसी विश्वकप लिग–२ अन्तर्गत शुक्रबारको खेलमा नेपालले अमेरिकालाई १२२ रनले हराएको छ । ३१८ रनको लक्ष्य पछ्याएको अमेरिकालाई नेपालले ४१ ओभर २ बलमा अलआउट गर्दै १२२ रनको सानदार जित निकालेको हो ।

कीर्तिपुरस्थिति त्रिवि मैदानमा टस जितेर पहिला बलिङ गरेको अमेरिकाविरुद्ध नेपालले पूरै ५० ओभर खेल्दै आठ विकेटको क्षतिमा ३१७ रन बनाएको थियो । नेपालका लागि उपकप्तान दीपेन्द्रसिंह ऐरी र इशान पाण्डेले अर्धशतक बनाउनुभयो । दीपेन्द्रले ३६ बलको सामना गर्दै चार चौका र चार छक्काको मद्दतमा ५९ रन बनाउनुभयो ।

अन्तिम क्रममा विष्फोटक ब्याटिङ गर्नुभएका ऐरी रनआउट हुनुभएको हो । तेस्रो क्रममा ब्याटिङ गर्नुभएका इशान पाण्डेले ८४ बलको सामना गर्दै आठ चौका र एक छक्काको मद्दतमा ८४ रनको अर्धशतकीय इनिङ खेल्नुभयो ।

कप्तान रोहितकुमार पौडेलले ४६ रन बनाउनुभयो भने ओपनर आशिफ शेखले ४३ रन बनाउनुभयो । ओपनर कुशल भुर्तेलले २९ रन जोड्नु भएको खेलमा गुल्सन झा १५ रनमा आउट हुनुभयो । आरिफ शेखले नटआउट १८ रन बनाउनुभयो भने सोमपाल कामीले चार रन जोड्दा नन्दन यादव एक रनमा आउट हुनुभयो । नेपाललाई सस्तैमा समेट्न अमेरिकाका लागि शुभम रञ्जनेले तीन विकेट हात पर्नुभयो भने रुसिल उगारकर र मिलन्दु कुमारले एकएक विकेट हात पर्नुभयो ।

जवाफी ब्याटिङ गरेको अमेरिकाका लागि सञ्जयकृष्ण मूर्तिले अर्धशतकीय इनिङ खेल्नुभयो । उहाँले संकटमा देखिएको अमेरिकाको ब्याटिङ लाइनलाई उकास्दै ४४ बलको सामना गरेर ५६ रन बनाउनुभयो ।

अमेरिकालाई सस्तैमा समेट्न नेपालका लागि सन्दीप लामिछानेले तीन विकेट हात पार्नुभयो भने ललितनारायण राजवंशीले दुई विकेट हात पार्नुभयो । सोमपाल कामी, दीपेन्द्रसिंह ऐरी र गुल्सन झाले एकएक विकेट हात पर्नुभयो ।

लिग–२ को तालिकामा अमेरिका ३८ अंकसहित शीर्ष स्थानमा छ । समान २८ खेल खेलेको नेपाल २४ अंकसहित पाँचौ स्थानमा कायम छ। योसँगै नेपालले अमेरिकालाई त्रिवि मैदानमा लगातार दोस्रो खेलमा हराएको हो । यसअघिको खेलमा नेपालले अमेरिकालाई ९ विकेटले हराएको थियो । घरेलु मैदानमा भएको यो शृङ्खलाका चारमध्ये तीन खेलमा विजयी हुँदै नेपालले महत्त्वपूर्ण ६ अंक जोडेको छ ।

Comments