मध्यपूर्वमा ऊर्जा र अन्य आपूर्ति अवरोध हट्न अझै समय लाग्छ : आइएमएफ

काठमाण्डौ । अमेरिका–इरानबीचको युद्धविराम घोषणाले मध्यपूर्वको तनावलाई कम गर्ने देखिए पनि ऊर्जा र अन्य आपूर्ति अवरोधहरू हट्न अझै समय लाग्ने देखिएको छ ।

अन्तर्राष्ट्रिय मुद्रा कोष (आइएमएफ) का प्रमुख क्रिस्टालिना जर्जिएभाले अमेरिका र इरानबीच भएको युद्धविराम सम्झौताको स्वागत गर्दै सम्झौतापछि पनि ऊर्जा र अन्य आपूर्ति अवरोधहरू कम हुन केही समय लाग्ने बताउनुभएको अन्तर्राष्ट्रिय समाचार संस्थाहरूले जनाएका छन् । युद्धविराम घोषणाको स्वागत गर्दै उहाँले तेल आपूर्तिमा पुनः प्राप्त हुन समय लाग्ने बताएको कोषको वेबसाइटमा उल्लेख भएको छ ।

हिजो संयुक्त राज्य अमेरिका र इरानले सबै मोर्चामा मध्यपूर्व युद्ध अन्त्य गर्न र हर्मुजको बाटो पुनः खोल्ने सम्झौताको घोषणा गरेका थिए । यसले महिनौँको हिंसा र विश्वव्यापी आर्थिक अराजकतापछि राहत मिल्ने भएको छ । कोषले आउने जुलाई ८ मा आफ्नो विश्व आर्थिक समीक्षा (डब्ल्युइओ) को अपडेट जारी गर्नेछ र त्यहाँ वृद्धि र मुद्रास्फीति प्रक्षेपण समावेश गर्ने जनाइएको छ ।

अप्रिलमा भएको डब्ल्युइओको समीक्षामा, कोषले युद्धको प्रभावको कारण विश्वव्यापी आर्थिक वृद्धिको प्रक्षेपणलाई घटाएको थियो । उहाँले इथियोपिया, मलावी र जाम्बियामा इन्धनको अभाव भएको उल्लेख गर्दै इन्धनको उच्च मूल्यले लेसोथो, रुवान्डा र तान्जानियाका उपभोक्ताहरूलाई खतरामा पारेको बताउनुभयो ।

युद्ध सुरु भएदेखि पेट्रोलको खुद्रा मूल्यमा ४० प्रतिशतले वृद्धि भएको छ र एसियाका उदीयमान बजार अर्थतन्त्रहरू पनि नराम्ररी प्रभावित भएका छन्। खाडीका तेल निर्यात गर्ने देशहरू युद्धबाट नराम्ररी प्रभावित भएका छन्, र यस वर्ष वृद्धिमा तीव्र गिरावट आएको छ भने आठ मध्ये पाँच देशमा पूर्ण रूपमा सङ्कुचन देखिएका छन्।

Comments