मुद्दाबीच पनि रवि प्रधानमन्त्री बन्न सक्ने सम्भावना नकार्न सकिँदैन: किशोर श्रेष्ठ

breaking news

काठमाडौं । वरिष्ठ पत्रकार किशोर श्रेष्ठले रास्वपा सभापति रवि लामिछानेमाथि लागेका मुद्दाहरूले उनलाई प्रधानमन्त्री बन्नबाट रोक्ने आशंका रहे पनि अहिले परिस्थिति बदलिएको बताएका छन् । लामिछाने उपप्रधानमन्त्री भइसकेको सन्दर्भमा अब उनलाई प्रधानमन्त्री बन्न पहिलेभन्दा सहज भएको श्रेष्ठको तर्क छ ।

एक अन्तर्वार्ताका क्रममा श्रेष्ठले लामिछानेका चुनौती र सम्भावनाबारे चर्चा गर्दै भने,”पहिले रविजीमाथि मुद्दाको भारी धेरै भएको हुनाले, जस्तो राहदानीको कुरा सर्वोच्चमा विचाराधीन छ, सहकारीको पनि कुरा आयो। ती हिसाबले उनलाई प्रधानमन्त्री हुनबाट छेक्छ कि भन्ने थियो।”

उनले थपे, “तर, उपप्रधानमन्त्री भइसकेको मान्छे प्रधानमन्त्रीमा जान अब पहिले जस्तो कठिन नहोला। अहिलेसम्मको परम्परा हेर्दा ठूला दल नेपाली कांग्रेस, एमाले, माओवादीका सबै अध्यक्ष/सभापतिहरू प्रधानमन्त्री भएका छन्।” श्रेष्ठले पछिल्लो समय सिर्जना भएको राजनीतिक माहोलले पनि लामिछानेलाई सहयोग पुग्ने संकेत गरे । चुनाव अघि बालेन शाह र रवि लामिछानेको पक्षमा बनेको एकता र माहोलले राजनीतिक समीकरणमा प्रभाव पारेको उनले उल्लेख गरे ।

उनले भने, “अहिले बालेनजीको पक्षमा जुन एउटा माहोल क्रिएट भएको छ, त्यसले पनि रविजीलाई अलिकति सहज चाहिँ अवश्य पारेको छ। मुद्दाका कारण उनी अहिले बाहिरिएको जस्तो देखिए पनि प्रधानमन्त्री बन्न सक्ने सम्भावना नकार्न सकिँदैन।”