विश्वकप २०२६: फ्रान्स सेमिफाइनलमा, मोरक्को २–० ले पराजित

breaking news

काठमाडौं । कप्तान किलियन एमबाप्पे र उसमान डेम्बेलेको उत्कृष्ट प्रदर्शनमा फ्रान्स फिफा विश्वकप २०२६ को सेमिफाइनलमा पुगेको छ। शुक्रबार अमेरिकाको बोस्टन स्टेडियममा सम्पन्न पहिलो क्वाटरफाइनलमा मोरक्कोलाई २–० ले हराउँदै फ्रान्सले अन्तिम चारमा स्थान सुरक्षित गरेको हो। खेलको पहिलो हाफमा एमबाप्पेले पेनाल्टीको अवसर सदुपयोग गर्न नसके पनि दोस्रो हाफमा उत्कृष्ट पुनरागमन गर्दै गोल गरे। उनले अर्को गोलका लागि पनि निर्णायक पास उपलब्ध गराए।

फ्रान्सका लागि पहिलो गोल ६०औँ मिनेटमा एमबाप्पेले गरे। त्यसको मात्र छ मिनेटपछि ६६औँ मिनेटमा एमबाप्पेको पासमा उसमान डेम्बेलेले गोल गर्दै टोलीको अग्रता २–० मा पुर्‍याए। त्यसपछि दुवै टोलीबाट थप गोल हुन नसक्दा फ्रान्स सहज जितसहित सेमिफाइनलमा पुग्न सफल भयो।

यससँगै फ्रान्स लगातार तेस्रो पटक विश्वकपको सेमिफाइनलमा प्रवेश गर्न सफल भएको छ। फ्रान्सले सन् २०१८ मा विश्वकपको उपाधि जितेको थियो भने २०२२ संस्करणमा उपविजेतामा सीमित भएको थियो। अब फ्रान्सले सेमिफाइनलमा बेल्जियम र स्पेनबीच हुने क्वाटरफाइनल विजेतासँग प्रतिस्पर्धा गर्नेछ। रासस