दीपक भट्टसंग जोडिएका सुलभ, साहिल र ललिताविरुद्ध झण्डै २ अर्बको विदेशी मुद्रा अपचलनको मुद्दा दर्ता गरिदै

काठमाडौं । विवादास्पद व्यवसायी दीपक भट्टसंगको अवैध कारोबार र विदेशी विनिमय अपचलनको आरोपमा सुलभ अग्रवाल, साहिल अग्रवाल र ललिता अग्रवालविरुद्ध सरकारी वकिलको कार्यालयले मुद्धा दर्ता गर्ने तयारी गरेको छ ।

विदेशी मुद्रा अपचलनमा दीपक भट्टसहित मिलेर वित्तिय अपराध गरेको भन्दै सम्पत्ति शुद्धीकरण अनुसन्धान विभागले अनुसन्धान गर्दा तीन जनाले करिब १ अर्ब ८५ करोड रुपैयाँ बराबरको अपचलन तथा सम्पत्ति शुद्धीकरण गरेको प्रतिवेदन तयार गरेको छ । सोही प्रतिवेदन अभियोजनका लागि जिल्ला सरकारी वकिलको कार्यालयमा पेस गरेको थियो ।

विभागले नेपालमा गैरकानुनी रूपमा आर्जन गरेको रकम विदेशमा लुकाएको आरोपमा अनुसन्धान पूरा गरी अनुसन्धान प्रतिवेदन बुझाएको हो । विभागका अनुसार उक्त सम्पत्ति दुबईमा लुकाइएको आशंका गरिएको छ । अनुसन्धान प्रतिवेदनका आधारमा जिल्ला सरकारी वकिल कार्यालय, काठमाडौंले तीनै जनाविरुद्ध काठमाडौं जिल्ला अदालतमा मुद्दा दायर गर्नेछ । मुद्दा आज वा भोलिसम्म दर्ता हुने विभागको तयारी रहेको जनाइएको छ ।

यस प्रकरणमा तीन जना प्रतिवादी उनीहरूमाथि विदेशी विनिमय तथा सम्पत्ति शुद्धीकरणसम्बन्धी कसुरमा अनुसन्धान गरिएको हो । यो प्रकरण दीपक भट्टसँग जोडिएको विषयका रूपमा समेत उल्लेख गरिएको छ । भट्टसँग मिलेर ठगी गरेको आरोपसम्बन्धी विषयमा समेत अनुसन्धान भएको जनाइएको छ ।

यसअघि विभिन्न अभियोगमा दिपक भट्टसहित उनीहरु विरुद्ध विशेष अदालत, जिल्ला अदालत काठमाडौं र उच्च अदालत पाटनमा पनि मुद्धा दर्ता भइसकेको छ । सम्पत्ति शुद्धीकरण अनुसन्धान विभागले नेपालमा गैरकानुनी रूपमा आर्जन गरी विदेशमा लुकाइएको सम्पत्तिको खोजी तथा पहिचान गर्दै त्यससम्बन्धी कानुनी कारबाही अघि बढाएको जनाएको छ ।

Comments