अच्यूतमणि न्यौपानेलाई सचिव पदमा बढुवा सिफारिस, ध्रुब चौहानलाई महान्यायाधिवक्ताको कार्यालयमा सरुवा

breaking news

काठमाडौं । न्याय सेवा आयोगको असोज २० गते मंगलबार बसेको बैठकले उच्च तहका अधिकृतहरूको सरुवा तथा बढुवा लागि सिफारिस गरेको छ ।

आयोगले सहन्यायाधिवक्ता अच्युतमणि न्यौपानेलाई नायव महान्यायाधिवक्ता (सचिव) पदमा सिफारिस गरेको छ । निवर्तमान नायव महान्यायाधिवक्ता सञ्जीवराज रेग्मीले यही असोज १८ गतदेखि अवकाश पाएपछि खालि ठाउँमा एक नम्बरमा रहेका सहन्यायाधिवक्ता न्यौपानेलाई नायव महान्यायाधिवक्तामा आयोगले सिफारिस गरेको हो । उनलाई वेपता पारिएका व्यक्तिको छानविन आयोगमा पदस्थापनाका लागि सिफारिस गरिएको छ । न्यौपानेसँग काठमाडौं जिल्लाको प्रमुख, अख्तियार दुरुपयोग अनुसन्धान आयोगलगायत विभिन्न जिल्लामा बसेर काम गरेको अनुभव छ ।

झापा जिल्ला स्थायी बसोबास भएका न्यौपाने २०३१ साल पौष ९ गते जन्मिएका थिए । २०६० साल फागुन २९ गते तृतीय श्रेणीबाट सरकारी सेवा प्रवेश गरेका उनले २०६९ साल कात्तिक १ गते द्वितीय श्रेणीमा नियुक्ति भएका थिए । उनी सहन्यायाधिवक्तामा २०७५ साल चैत १४ गते नियुक्ति भएका थिए ।

यसैगरी ध्रुवकुमार चौहानलाई महान्यायाधिवक्ताको कार्यालयमा सरुवा गरिएको छ । चौहान हाल वेपत्ता पारिएका व्यक्तिको छानबिन आयोग, काठमाडौंमा सचिवका रूपमा कार्यरत छन् । उनलाई महान्यायाधिवक्ताको कार्यालय, काठमाडौंमा नायब महान्यायाधिवक्ताका रूपमा सरुवा गर्न सिफारिस गरिएको हो ।