विवादमा तानिए ओबामा

जेलमै आत्महत्या प्रयास

म्यानिङ अमेरिकी इतिहासमा अहिलेसम्मकै ठूलो सूचना चुहावट गर्ने व्यक्ति हुन् । उनले सात लाख गोप्य सूचना चुहाएकी थिइन् । तीमध्ये अधिकांश सूचना सुरक्षासँग सम्बन्धित थिए । उनले गत वर्ष कारागारमा दुईपटकसम्म आत्महत्या प्रयास गरेकी थिइन् । उनले भोक हडतालसमेत गरेकी थिइन् । सेनाले उनलाई मानसिक रोग लागेको भन्दै उपचार गरेको थियो । उपचारपछि हडताल स्थगित गरेकी थिइन् । राष्ट्रपति ओबामाले उनलाई माफी दिएसँगै म्यानिङ आगामी १७ मेमा रिहा हुनेछिन् ।

२०९ जनाको सजाय कटौती

आफ्नो कार्यकालमा राष्ट्रपति ओबामाले विभिन्न अभियोग लागेका दुई सय नौजना अमेरिकीको सजाय कटौती गरिदिएका छन् भने ६४ जनालाई माफी दिएका छन् । संख्याका हिसाबले राष्ट्रपति ओबामाले दिएको क्षमादान पूर्वराष्ट्रपतिहरूका तुलनामा न्यून हो । राष्ट्रपतिसमक्ष क्षमादानका लागि याचना गर्दै ह्वाइटहाउसमा हजारौँले निवेदन दिएका थिए । कार्यकालको अन्तिम समयमा अमेरिकी राष्ट्रपतिले राजकीय शक्तिको प्रयोग गर्दै क्षमादान वा दोषीमाथिको सजाय कटौती गरिदिने चलन छ । क्षमादानका लागि अनुरोध गर्नेमा विकिलिक्सका संस्थापक एडवार्ड स्नोडेनदेखि तालिबानले नियन्त्रणमा लिएका अमेरिकी सैनिक बोवी बर्गड्यालसम्म छन् ।

विवादमा तानिए ओबामा

चेल्सी म्यानिङको सजाय कटौती गरेसँगै राष्ट्रपति ओबामा विवादमा तानिएका छन् । म्यानिङबारे अमेरिकामा परस्पर विरोधी धारणा छ । केही अमेरिकीको विचारमा म्यानिङ संगठनका कर्तुत सार्वजनिक गरी वास्तविकता पर्दाफास गर्ने साहसी महिला हुन् । तर, धेरैले उनलाई देशद्रोही भन्छन् । उनलाई माफी दिनुपर्ने माग गर्दै एउटा समूहले अभियान नै चलाएको थियो । उनको रिहाइको माग गर्दै एक लाख मानिसले ह्वाइटहाउसमा निवेदन दिएका थिए । म्यानिङलाई माफी दिने ओबामाको निर्णयलाई सभामुख पल रायनले ‘विश्वासघात’ बताएका छन् । त्यस्तै, रिपब्लिकनका सांसदहरूले पनि ओबामाको निर्णयको विरोध गरेका छन् । सन् २०१३ मा म्यानिङलाई अदालतमा अभियोग लगाउँदा अभियोजनकर्ताले उनलाई ३५ वर्षभन्दा बढी सजाय माग गरेका थिए । उनको सजाय भावी दिनमा सम्भावित सूचना चुहावटकर्ताका लागि ठूलो पाठ हुने बताइएको थियो । उनको कार्यले अमेरिकाको सुरक्षालाई खतरामा पारेको विज्ञहरूले बताएका थिए ।

Comments