माओवादी केन्द्रलाई झड्का, एक सय असीजना कार्यकर्ता एमालेमा प्रवेश

राजनीति

काठमाडौं । अर्घाखाँची जिल्ला खनदह गाविसका मा नेकपा माओवादी केन्द्रका राष्ट्रिय महाधिवेशन आयोजक कमिटी सदस्यसमेत १ सय ८० जना नेकपा एमालेमा प्रवेश गरेका छन् । राष्ट्रिय महाधिवेशन आयोजक कमिटी सदस्य जीवन चौहानसहितका नेता तथा कार्यकर्ता माओवादी केन्द्र छोडेर एमालेमा प्रवेश गरेका हुन् ।
पार्टी प्रवेश कार्यक्रममा माओवादी केन्द्रका राष्ट्रिय महाधिवेशन आयोजक कमिटी सदस्य जीवन चौहान, केन्द्रका जिल्ला कमिटी सदस्य पर्शुराम पोख्रेल, पूर्व गाउँ कमिटी अध्यक्ष विष्णुप्रसाद खनाल, पूर्व उपाध्यक्ष कुलप्रसाद खनाललाई एमालेले टीका लगाएर स्वागत गरेको थियो ।

माओवादी केन्द्र त्याग्नेमा पूर्व सचिव वसन्ता गौतम, पूर्व गाउँ कमिटी सदस्य नारायण पोख्रेल, मतिलाल खनाल, कमल चौहान, मधुसुदन पोख्रेल, रेमकला विक, इन्दिरा खनाल, सावित्रा खनाल, अनेमसङ्घ क्रान्तिकारी जिल्ला कमिटी सदस्य विमला चौहान, दिपा पोख्रेल, माओवादी केन्द्रका सदस्य दिपनारायण चुदाँली, जिवलाल खनाल, खुबिराम खनाल, टोपलाल गिरीलगायत नेता कार्यकर्ता रहेको एमाले जिल्ला कमिटी अध्यक्ष चेतनारायण आचार्यले बताए ।

आफ्नो मेहनत र पसिना एमालेमै खर्र्चिएको र आफू आफ्नै पुरानो घरमा फर्किँदा खुसी लागेको साथै मुलुकको आमूल परिवर्तन गर्न नेकपा एमालेमात्रै सक्षम रहेको प्रवेशपछि नेता जीवन चौहानले बताएका छन् ।