देशभर १८ हजार पाँच सय ७२ वटा मतदान केन्द्र कायम

समाचार

काठमाडौं ६ बैशाख । निर्वाचन आयोगले मतदान केन्द्रको टुंगो लगाएको छ । आयोगले आज गरेको निर्णय अनुसार १८ हजार पाँच सय ७२ मतदान केन्द्र कायम गरेको हो । यस्तै ती मतदान केन्द्र रहने मतदान स्थलको संख्या १० हजार छ सय ४० कायम भएका छन् ।

बढी मतदाता भएको ठाउँमा एक हजार मतदातासम्मलाई एउटा केन्द्र मानेको निर्वाचन आयोगका प्रवक्ता सूर्यप्रसाद शर्माले जानकारी दिए । साथै उनले एउटै मतदानस्थलमा धेरै वटा मतदान केन्द्र पनि हुनसक्ने जानकारी दिए ।

यस अघि आयोगले २१ हजार बढी मतदान केन्द्र हुन सक्ने र करिब १३ हजार बढी मतदान स्थल हुनसक्ने अनुमान सार्वजनिक गरेको थियो।

पछिल्लो संविधानसभा निर्वाचनमा देशभर १० हजार १३ वटा मतदान स्थल र १८ हजार ४ सय ३८ मतदान केन्द्र थिए।

प्रदेश नम्बर २ मा मधेसकेन्द्रित राजनीतिक दलले सहमति नजाएका कारण मतदान केन्द्र निर्धारण गर्न ढिला हुँदा आयोगले मतदान हुने २५ दिनअघि मात्र मतदान केन्द्र सार्वजनिक गरेको हो।

मतदान केन्द्र निर्धारणमा ढिलाई भएकै कारण आयोगले मतदाता नामावली समेत ढिला मात्र सार्वजनिक गरी आयोगको वेबसाइटमा राखेको थियो।
गत चैत मसान्तअघि नै मतदान केन्द्रको टुंगो लगाए पनि आयोगको बैठकबाट निर्णय नहुँदा आयोगले मतदान केन्द्रको संख्या सार्वजनिक गरेको थिएन।