प्रमुख आयुक्तले रोके नयाँ शक्ति र फोरमको मोटरसाइकल र्‍याली, २४ घण्टे स्पष्टीकरण माग

समाचार

काठमाडौं,२३ बैशाख । प्रमुख निर्वाचन आयुक्त डा। अयोधीप्रसाद यादवले नयाँ शक्ति र फोरमको मोटरसाइकल र्‍याली रोकेका छन् ।

शनिबार अनुगमनमा निस्किएका यादवले ललितपुरको महालक्ष्मी नगरपालिकामा निर्वाचन आचारसंहिता विपरित मोटरसाइकल र्‍याली निकालिएको भेटाएपछि तत्काल रोकेका हुन् । त्यहाँ दुबै दलले जनक थापालाई मेयरको उम्मेदवार बनाएका छन् ।
निर्वाचन आयोगले संघीय समाजवादी फोरम र नयाँ शक्ति पार्टीलाई निर्वाचन आचारसंहिता उल्लंघनमा २४ घण्टाभित्र स्पष्टीकरण मागेको छ ।

आयोगले सोधेको स्पष्टीकरणमा भनिएको छ, ‘निर्वाचन आचारसंहिता विपरीत काम कारबाही गरेको कसूरमा हदैसम्मको कारबाही किन नगर्ने ? कारबाही गर्नु नपर्ने कुनै कारण भए प्रस्तुत पत्र प्राप्त भएको मितिले चौबिस घण्टाभित्र आयोगसमक्ष स्पष्टीकरण पेश गर्नु हुन आदेशानुसार अनुरोध छ ।’

निर्वाचन आचारसंहिता, २०७२ को परिच्छेद २ दफा ५ को ‘क’ को १३ मा ”निर्वाचन प्रचार प्रसारको क्रममा मोटरसाइकललगायत मानिस वा मालसामान ढुवानी गर्न प्रयोग हुने साइकल, रिक्सा, टाँगा, एक्का तथा गोरुगाडाजस्ता सवारी साधनको र्‍याली गर्न वा गराउन नहुने’ उल्लेख छ ।